Ekitaldian Íñigo Alli Gizarte Politiketako kontseilariak eta Miguel Induráin epaimahaiburuak ere parte hartu dute. Azken horrek saria emateko akta irakurri du.  Ekitaldian izan dira, baita ere, Javier Morrás Lehendakaritza, Justizia eta Barne kontseilaria, Alberto Catalán Nafarroako Parlamentuko lehendakaria, Carmen Alba Gobernuaren Nafarroako ordezkaria, Julio Gallastegui Laboral Kutxako zuzendari nagusia eta Javier Cortajarena Nafarroako Laboral Kutxako lurralde-zuzendaria.

Ekitaldian Nafarrroako Goi Mailako Musika Kontserbatorioko kantuko laukotearen musika egon da entzungai. Carmen Arbizuk zuzendu du Andrea Jiménez (sopranoa), Erkuden Eceolaza (mezzosopranoa), Rubén Lardiés (tenorra) eta Roberto Perdiguerok (baritonoa) osaturiko taldea. Thoinor Arbeau-ren "Amor que me cautivas", Luis Cluzeau Mortet-en "Vidalita de Cerro Largo" eta Resurrección Mª de Azkueren Cancionero Popular Vasco bildumako "Orra or goiko" abestu dituzte.

Sarituaren merituak eta epaimahaia

"Nafarroa" Elkartasunaren Nazioarteko Sariarekin, epaimahaiak Martha Pellonik haurren eta nerabeen trafiko, salerosketa eta sexu-esplotazioaren, haurren abusuen, drogazaletasunaren eta emakumeenganako indarkeriaren aurka gauzatutako "prebenitzeko, laguntzeko eta borrokarako" ekintzak aitortu ditu.

Saria emateko aktak Martha Pellonik egindako salaketak, familiei emandako laguntza eta "kasuak argitzen eta gizakien duintasuna erabat errespetatzen ez zituzten lege eta jardun kaltegarriak aldatzen lagundu duten" erreklamazioetan izandako irmotasuna ere nabarmentzen ditu.

Epaimahaiburua Miguel Induráin txirrindulari ohia izan da, eta honako hauek gainerako epaimahaikideak: Íñigo Alli Gizarte Politiketako kontseilaria, Javier Cortajarena Nafarroako Laboral Kutxako lurralde-zuzendaria, Miguel Ángel Argal Nafarroako Medicus Mundiren sortzaileetako bat, Xavier Longan Nazio Batuen Erakundeko Milurtekoko Kanpainako Hiri eta Tokiko Gobernuekiko (Europa) harremanen arduraduna, María Luz Ortega garapenerako hezkuntzan aditua eta Maider gabilondo Nafarroako UNICEFeko koordinatzailea. Idazkari gisa jardun da Andrés Carbonero, Garapenari Arreta Emateko eta Pertsonak Gizarteratzeko Zerbitzuko zuzendaria.

Topaketak eta sarituaren hitzaldia, bihar

"Nafarroa" Elkartasunaren Nazioarteko Saria jasotzeko Foru Komunitatera bisitan etorri denez, Martha Pelloni, bihar, otsailak 25, 10:30ean, Iruñeko Cuatrovientos institutuko 150 ikaslerekin elkartuko da.

Ikastetxea Hezkuntzako eta Gizarte Politiketako departamentuek eta GGKEren koordinatzaileak sustatutako Elkartasunaren aldeko eskolak proiektuko partaidea da. Horren bidez, irakasleak trebatu eta aholkatzen dira, ondoren, ikasleak garapenerako eta laguntzarako garapenaren gaietan sentsibilizatzeko.

Horrez gain, bihar, asteartea, 20:00etan, Martha Pellonik hitzaldi bat eskainiko du, Larraona Ikastetxe Nagusian, Argentinan giza eskubideak defendatzeko lanean izan duen esperientzia kontatzeko. Sarrera doakoa izango da.

Ilundaingo (Aranguren) Haritz-Berri fundazioan ere izango da, eta, Proclade fundazioak antolatuta, Nafarroako Emakume Taldeen edota Feministen Erakundeen Koordinakundearekin elkartuko da.

Martha Pelloni

Martha Pelloni Buenos Airesen (Argentina) jaio zen 1941. urtean, eta Misiolari Karmeldar Teresarren kongregazioko jainkozalea da. 1990. urtean, Argentinako Catamarca probintziako ikastetxe bateko errektorea zenean, María Soledad Morales ikaslearen bortxaketa eta hilketa bortitza hurbiletik bizi izan zituen. Geratera hark Martha Pellonik Argentinako haurren giza eskubideen aldeko konpromisoa hartzea ekarri zuen, batez ere adingabeen salerosketaren, sexu-esplotazio eta -abusuen, eta lapurreten aurka.

Urte hartan, 1990ean, Pellonik isiltasunaren ibilaldi bat antolatu zuen (bera buru izan zuten 82 ibilaldietatik lehena) María Soledaden hilketa argitu eta arduradunak epaitzeko bidean aurrera egiteko, eta zabaldu ziren ustelkeria eta botere-abusuen kasuetan Gobernuak probintziako hiru botereek esku hartzea dekretatzeko. Konpromiso publiko horren ondorioz, sarituak presio eta irain ugari jaso zituen.

Pellonik haurren lapurreta- eta salmenta-kasuak argitzeko lanetan ere hainbat familiari lagundu die. 2008an Haur Lapurtuen Sare Nazionala eratu zuen, Argentinako zazpi probintziatako 21 foro sozialek osatuta. Erakundearen helburua haurren eta nerabeen salerosketa eta esplotazioari aurre egitea, prebenitzea, laguntza ematea eta borroka egitea da, besteak beste. Jainkozaleak Santa Teresa fundazioa, nekazariei lagundu eta horiek trebatzeko, eta premia handiena dutenei laguntzeko Curuzú Cuatiáko Giza Eskubideen Etxea sortu ditu.

2005ean egindako lanagatiko nazioarteko esker ona jaso zuen Bakearen Nobel Sariaren hautagaitzarekin. Hautagaitzan izan ziren, baita ere, Bakearen Munduko Emakumeen erakundeko beste mila emakume.

"Nafarroa" Elkartasunaren Nazioarteko Saria

"Nafarroa" Elkartasunaren Nazioarteko Saria 2001. urtean sortu zen Laboral Kutxarekin elkarlanean. Sariaren helburua haien ibilbidean azpimarratzeko ekintzak gauzatu dituzten instituzio, gobernuz kanpoko erakunde eta pertsona fisikoen lana eskertzea da. Erakunde eta pertsona horiek garapenerako nazioarteko lankidetzaren edozein alorretan burutzen dituzte ekintzak eta, batez ere, Milurtekoko Garapen Helburuak betetzeko ahalegina egiten dute.

Laboral Kutxak sariaren finantziazio osoa hartzen du bere gain. 40.000 euro dira guztira: 25.000 euro saria eta 15.000 saria kudeatzeko gastuetarako. Bestalde, Gizarte Politiketako Departamentua sariari buruzko informazio zabaltzeko, epaimahaia eratu eta antolatzeko, hautagaitzak jaso eta aztertzeko eta saria emateko ekitaldiarekin loturiko zereginez arduratzen da.

Aurreko 11 edizioetan, honako hauek jaso dituzte sariak: Mama Tunza kenyarra (2012), Manuel Elkin Patarroyo zientzialaria (2011), Creative Handicrafts GKEa (2010), Aguaricoko Bikariotza Apostolikoa (2009), Mama Samateh Saidy eta Wassu Gambia Kafo GKEa (2008), San Joan Jainkoarenaren Ordena Ostalaria (2007), Fe y Alegría mugimendua (2006), UNASO erakundea (2005), Errefuxiatuentzako Zerbitzu Jesuita (2004), Karitateko Ahizpa Misiolariak (2003) eta Muhhamad Yunnus (2002).