Irailean eta ekainean, aste bakoitzeko 50 euro ordaindu beharko dira gela bikoitzean eta guztientzako zerbitzuekin, 62,50 euro banako gelan eta guztientzako zerbitzuekin, 75 euro banako gelan bainugelarekin eta 75 euro gela bikoitzean bainugelarekin. Hilabete osoa geratzen direnek gainerako hilabeteetako kuota bera ordainduko dute.

308 euro hileko mantenua

Gainera, mantenua hilero ordainduko zaio enpresa esleipendunari, banku-helbideratze bidez, hilabete hasieran. Urriaren 1etik abenduaren 19ra, mantenua 308 euro izango dira hilero gehienez.

Urtarrilaren 7tik 2015eko maiatzaren 31rako prezioa Nafarroako Kirolaren eta Gazteriaren Institutuko Gobernu Batzordeak onetsi ondoren ezarriko da.

Eskaeren aurkezpena, irizpideak eta hautaketa-baremoak

Eskaerak posta ziurtatu bidez bidali edo Nafarroako Kirolaren eta Gazteriaren Institutuko Erregistroan (Emilio Arrieta kalea 25, 31002 Iruña) aurkeztu beharko dira, ekainaren 20a baino lehen.

Batzorde batek aztertuko ditu honako irizpide hauei jarraiki:

Lehenik eta behin, lehentasuna izango dute 2013-2014 ikasturtean egoitzan bizi izan diren ikasleen eskaerek, betiere ikasturte horretan 2 ikasgai baino gehiago suspenditu ez badituzte edo, unibertsitateko ikasketak egiten ari direnen kasuan, matrikulatutako kredituen % 45 gainditzen badituzte.

Bigarrenik, unibertsitatekoak ez diren derrigorrezkoaren ondoko ikasketak eskaintzen ez dituzten herrietako ikasleek izango dute lehentasuna, baldin eta halako irakaskuntza eskaintzen duen beste ikastetxerik ez badago eragin-eremuan.

Azkenik, egoiliar berriek aurkeztutako eskaerak onartuko dira eskatzen diren baldintzak betetzen badituzte.

Egoiliar berriak onartzeko orduan eskaintzen diren 45 plazak baino eskaera gehiago jasotzen badira, honako baremo hau aplikatuko da:

a) Nafarra izatea edo 2014ko urtarrilaren 1ean Nafarroan bizitokia izatea, 10 puntu.

b) Eskolako notak (ikasturte bakoitzeko puntuazioa): 8,5 eta 10 arteko batez besteko nota: 12 puntu; 7,1 eta 8,4 arteko batez besteko nota: 10 puntu; 6,1 eta 7 arteko batez besteko nota: 8 puntu, eta 5 eta 6 arteko batez besteko nota: 6 puntu.

c) Eskatutako ikasturtean egoitzan anai-arreba bat izatea, 3 puntu.

d) Iruñean hezkuntza-zikloa hastea, 4 puntu.

e) 2013-2014 ikasturtean Hezkuntza eta Kultura Departamentuaren beka eskuratu izana, 3 puntu.

f) Familia ugari batekoa izatea, 3 puntu.

g) Ikasten jarraitu ahal izateko Iruñera joateko premia eta beste egoitza publiko bateko eskaintza izatea: 5 puntu; ikasten jarraitu ahal izateko Iruñera joateko premia eta beste eskaintzarik ez izatea: 10 puntu.

h) Gainera, batzorde ebaluatzaileak, eskatzaile bakoitzaren merituak kontuan hartuta, gehienez 5 puntu emateko eskumena izango du, eskatzailea, duen egoera soziofamiliarra dela-eta, onartzea proposatzen duten instituzio ofizialen txostenei jarraiki.

Eskainitako plaza kopurua handitu ahal izango da Kirol Zuzendariordetza Nagusiak egoiliar kirolarientzako plaza guztiak betetzen ez baditu.