Logroñoko Nafar Etxeak ere txupinazoa botako du 12:00etan, Portales kaleko 23. zenbakian dagoen egoitzako bakoitik. Horretarako, Cuca Gamarra hiriko alkatea gonbidatu da. Jarraian topa egingo dute ardoarekin eta cavarekin. Larunbatean, uztailak 12, 12:00etan, San Bartolomé elizan San Ferminen aldeko meza egingo da, "Raíces Navarras" joten taldearen musikarekin. Igandean, 13an, senidetasun-bazkaria egingo da.

Bestalde, Zaragozako Nafar Etxeak txupinazoa botako du bere egoitzatik (Santiago kalea, 27) eta, ondoren, bertaratzen direnei ardoa eta pintxoak eskainiko dizkie. Uztailaren 7an, arratsaldeko 20:00etan, San Ferminen aldeko meza egingo da Santa Capilla de la Basílica del Pilar elizan. Egun horretan, Birjinaren irudiak Nafarroako armarria duen kapa eramango du soinean, Nafar Etxeen Federazio Nazionalak opari gisa emandakoa. Eguna amaitzeko, senidetasun-afaria egingo dute.

Bilbon, ospakizunen programa larubatean, uztailak 5, hasiko da, 14:00etan, Nafar Etxearen egoitzan (Plaza Barria, 5) egingo den potxa-jan herrikoi batekin eta 18:00etan Nafar Etxeko aretoan izango den hildako bazkide eta jarraitzaileen aldeko mezarekin. Igandean, 12:00etan, txupinazoa botako da Plaza Barriko balkoitik eta, ohitura den bezala, martxa hasiko da, Iruña kafetegira (Albia lorategia) iritsi arte.

Astelehenean, uztailaren 7an, Misa Navarra abestuko du "Alegría Ribera" jotarien taldeak San Nikolas elizan. "Sama Siku" txaranga ibiliko alde zaharreko kaleetan barrena Sanferminetako kalejirak jotzen. Ondoren, senidetasun-bazkaria egingo da Nafar Etxean.

Burgoseko Nafar Etxeak Vadillos plazan duen egoitzatik botako du txupinazoa eta txistorra-dastaketa eskainiko du. 14:00etan, San Ferminen aldeko meza egingo da La Merced elizan. CODA taldeak abestuko du elizkizunean eta, ondoren, senidetasun-bazkaria egingo dute, talde berak alaituta, Casino jatetxean.

Sevillan, Espisona y Cárcel kaleko 16. zenbakian dagoen egoitzan, Nafar Etxeak txupinazoa botako uztailaren 6an, 12:00etan. Sanferminetako musikak eta, kalejirek alaituko dute giroa eta Nafarroako ardoak eta calderete tipikoa dastatu ahal izango da. Astelehenean, uztailak 7, 20:00etan, San Ferminen aldeko meza egingo da Padres Blancos elizan eta, ondoren, senidetasun-afari bat.

Bestalde, Valladoliden, Kultur Etxeko eta Nafar Etxeko bazkide eta jarraitzaileek txupinazoa ospatuko dute San José kaleko egoitzan, Nafarroako ardoaz eta abestiez gozatuz. Uztailaren 7an San Fermin meza izango da Santiago parrokian eta, ondoren, bazkide eta lagunentzako afaria egingo da. Amaitzeko, Santanderren, San Ferminen aldeko elizkizun batera deitu ditu Kantabriako Nafar Etxeak bere bazkide eta jarraitzaileak. Uztailaren 7an izango da, arratsaldean, Santísimo Cristo elizan. Ondoren, ekitaldi sozial batean, San Fermini buruzko bideo bat proiektatuko da. Uztailaren 14an senidetasun-bazkia egingo da eta "Pobre de mí" abestuko da.

Ospakizunak Argentinan eta Frantzian ere

Argentinako hiru Nafar Etxek antolatu dituzte ekitaldiak 2014ko San Fermin dela eta.

Rosarion, txupinazoa uztailaren 5ean, larunbata, botako dute, 13:00etan, Entre Ríos kalean dagoen Rosarioko Nafar Etxearen egoitzako balkoitik. Ondoren bazkaria egingo da. 19:30ean, dantzari txiki, ertain eta nagusien taldeak eta Fermín Sanchotena txistu-eskolakoek ikuskizun folklorikoa eskainiko dute.

Igandean, uztailak 6, hildako bazkideak omenduko dituzten Navarra plazan eta kalejira egingo dute hiriaren erdigunetik erraldoiek, buruhandiek, zaldikoek, musikariek eta dantzariek lagunduta, 25 de mayo plazara iritsi arte. Han, Nafarroako dantzen emanaldia egongo da ikusgai. 19:00etan, San Ferminen aldeko meza egingo da Rosarioko katedralean.

Astelehenean, uztailaren 7an, San Ferminen irudia eramango den prozesio bat egingo da eta "La Jarana" eta "La Única" zentroko peñek prestatutako janariarekin afaria egingo dute. Asteartean, uztailaren 8an, jaiegunaren bezperan, San Ferminetako ohiko jamonada deritzona egingo dute. Ondoren, dantzaldia egongo da eta, goizaldeko 3:00etan, entzierroa ikusiko dute zuzenean. Horrez gain, baratxuri-zopa, txokolatea eta txurroak eta pattarrak dastatuko dituzte.

Mendozako Nafar Etxeak 30 urte betetzen ditu aurtengo Sanferminetan, horregatik, dantzarien taldeak, Alma Navarra abesbatzak eta Grupo de Danzas Folklóricas y Españolas de Adultos taldeak emanaldia eskainiko dute, Igandean, uztailaren 6an, Guaymallén azoka-barrutian. Uztailaren 7an San Fermin irudia eramanez, prozesioa egingo dute eta, ondoren, ohitura den bezala, Sanferminetako paella egingo dute.

Bolivarreko Nafar Etxean Sanferminak eta zentroa eratu zela 60 urte ospatuko dira aldi berean, beraz, ekitaldien programa iragan ekainaren 22an hasi zen ikuskizun batekin. Bertan, Nafar Etxearen parte diren dantza-taldeak, Raíces Navarrak abesbatzak eta Club de Tango taldeak parte hartu zuten. Uztailaren 7an, zentroko bazkide eta jarraitzaileak San Carlos parrokiara joango dira, San Ferminen omenez eta hildako bazkideen alde egingo den meza entzutera. Uztailaren 11n mus-txapelketa egingo da hirukoteka eta, 12an, afaria eta dantzaldia egingo dira Nafar Etxean. Afalondoan telebista-seinalera konektatuko dira Iruñeko entzierroa zuzenean ikusteko.

Amaitzeko, Pariseko Nafar Etxean hilabete lehenago ospatu zuten San Fermin, ekainaren 7an alegia. Bazkaria egin zuten, Nafarroako produktuekin, eta 140 pertsona izan ziren bertan.