Arboladien basogintzako kudeaketari dagokionez, aurten, itxura guztien arabera, % 15 inguru handituko dira Urbasako egurraren eta su-egurraren aprobetxamenduak, horrek mendiaren iraunkortasunari kalterik egin gabe. Gainera, mendi-bideak eta landaredi gutxiko guneak hobetzen eta barrutietako itxiturak gainbegiratzen ari dira.

Basogintzako erabileraren barruan, berriki esleitu da Urbasa antolatzeko proiektuaren 5. berrikusketa. Horren bidez, parkearen basogintzako kudeaketa iraunkorra bermatuko da datozen hamar urteetan. Lanak aurtengo urtean eta hurrengoan, 2015ean, egingo dira. Zehazki, 55.856 euro euro inbertitu dira horretan 2014an.

Parkearen erabilera turistikoari dagokionez, Urederra ibaiaren iturburuko natura-erreserbarako sarbidea arautzea izan da aurtengo berritasun nagusia. Hala, 450 pertsona egon ahal izango dira bertan aldi berean. Horri lotuta, esan beharra dago 2013an 103.271 bisitari egon zirela bertan, eta, aurreko urtean, 73.806. Hori dela-eta, beharrezkoa izan zen sarbidea arautzea.

Azkenik, Natura 2000 Sareko parkea zaintzeko neurriei dagokienez, aurten, Andiako pagoak kimatzen, Andiako anfibioentzako urmaelak inguruko buztin naturalekin eta bigarren mailako espezieak landatuta iragazgaizten, eta ugatzen, miru gorrien, sai zurien, bertako karramarroen eta inguruan dauden intereseko beste espezie batzuen jarraipena egiten ari dira.

Parkearen patronatuko kideak

Honako tokiko erakunde hauetako ordezkariek osatzen dute Urbasa-Andia parke naturalaren patronatua: Abartzuza, Altsasua, Ameskoabarren, Aranaratxe, Arbizu, Bakaiku, Etxarri Aranatz, Ergoiena, Eulate, Irañeta, Iturmendi, Larraona, Lezaun, Olazti, Uharte-Arakil, Urdiain, Deierri eta Ziordia herrietako eta Arakil, Goñi, Gesalatz Ollaran aranetako udalak.

Horiez gain, Jurramendi eta Sakanako mankomunitateek, Urbasa eta Andiako eta Limitaciones mendiko Larre Batzordeek, Arañatz elkarteak, UAGN eta EHNEk, Aranaratxe eta Etxarri Aranazko ehiztarien elkarteek, Ekologistak Martxan eta Gurelur erakundeek, TEDERek, Estellerriko Turismo Partzuergoak eta Cederna-Garalur sozietateak ere osatzen dute.

Nafarroako Gobernuko ordezkarien aldetik, Landa Garapeneko, Ingurumeneko eta Toki Administrazioko kontseilaria, Uraren eta Ingurumenaren zuzendari nagusia eta Mendi; Abeltzaintza; Biodibertsitatea eta Antolamendua, eta Produktu Turistikoen Garapena zerbitzuetako buruak daude partzuergoan.