Zehazki, iktus-kodearen asmoa da iktusa duten gaixoak egoki identifikatzea eta iktusaren unitateetan arterietako trabak kentzeko terapiak eta zainketa bereziak ahal bezain laster aplikatzea, erabil daitezkeen kasuetan.

Infartu-kodeari dagokionez, bihotzekoak arin-arin antzematen eta jakinarazten dira, baita gaixoak zentro espezifikoetara eraman ere, arteriak garbitzeko tratamenduak lehenbailehen aplikatzeko, ahal den guztietan.

Lehenbiziko 24 orduak

Denboraren mendeko larrialdietarako estrategiaren asmoak hauek dira, besteak beste: ospitalez kanpoko heriotza-tasa murriztea, baita ospitaleratu eta lehenbiziko 24 ordutakoa ere; larrialdi-zerbitzuak aktibatzeko eta gaixoengana heltzeko denbora orokorra gutxitzea, hil ala biziko kasuetan; ospitalez kanpoko bihotz-gelditzeetan, berpizteko maniobrak edo/eta desfibriladorea lekuan bertan gehiago erabiltzea; bihotz-gelditzea etetea lortzen den kasuen portzentajea handitzea; eta gaixoek kardiopatia iskemikoa, iktusa edo politraumatismoa dituztela sumatutako kasuetan ospitaleko dispositiboa gaixoa heldu baino lehen aktibatzea lortzea.

Horrez gain, helburu hauek ere lortu nahi dira: larrialdietako garraioa baliabide tekniko egokiekin gauzatzea eta gaixoak protokoloetan ezarritako moduan zaintzea, patologia horiek dituzten gaixoak ospitalera ordubete pasa baino lehen heltzea, medikuarekin lehen harremana izaten denetik lehenbiziko proba diagnostikoa egiten den arte eta protokoloan zehaztutako lehen esku-hartzea egiten den arte igarotzen den denbora gutxitzea, larrialdi baskularrak dauzkaten eta protokoloan jarritako denboran birbaskularizazioa egiten zaien edo/eta terapia tronbolitikoa jasotzen duten gaixoen portzentajea handitzea, biztanleei hil ala biziko kasuen arrastoak eta sintomak antzematen eta horien arabera jokatzen erakustea, eta osasun arloko eta herritarren babes-zerbitzuetako langileak hil ala biziko larrialdien inguruan hobeto prestatzea.

Estrategiako kideak

Denboraren mendeko larrialdietan arreta emateko estrategiaren arduradun teknikoa eta Nafarroako hil ala biziko larrialdietako arretaren zuzendari teknikoa Javier Sesma da, NOGeko larrialdi-zerbitzuko burua. Gainera, Maria Soledad Alcasena, NOGeko Bihotzaren Ataleko kardiologoa, miokardio-infartuaren protokoloaren eta aktibazio-kodearen koordinatzaile teknikoa izango da; Jaime Gallego, NOGeko Neurologia Zerbitzuko burua, iktusaren protokoloaren eta aktibazio-kodearen koordinatzaile teknikoa; Tomas Belzunegui, NOGeko Larrialdi Zerbitzuko medikua, politraumatismoen protokoloaren eta aktibazio-kodearen koordinatzaile teknikoa; eta Diego Reyero, Ospitalez Kanpoko Larrialdi Zerbitzuko medikua, ospitalez kanpoko bihotz-gelditzeen protokoloaren eta aktibazio-kodearen koordinatzaile teknikoa eta herritarrei hil ala biziko kasuetan zer egin erakusteko programaren koordinatzailea.

Azkenik, denboraren mendeko larrialdietarako estrategiaren Batzorde Zuzentzailea sortu dute, koordinazio eta aholkularitza organo teknikoa gisa. Honako hauek dira Batzorde horretako kideak: estrategiako arduradun teknikoa, ospitalez kanpoko larrialdietako zuzendariordea, Nafarroa Hegoaldeko eta Mendebaldeko Lehen Mailako arretako zuzendariordea, iktusaren protokoloaren eta aktibazio-kodearen koordinatzaile teknikoa, miokardio-infartuaren protokoloaren eta aktibazio-kodearen koordinatzaile teknikoa, politraumatismoen protokoloaren eta aktibazio-kodearen koordinatzaile teknikoa, ospitalez kanpoko bihotz-gelditzeen protokoloaren eta aktibazio-kodearen koordinatzaile teknikoa eta herritarrei hil ala biziko kasuetan zer egin erakusteko programaren koordinatzailea, Tuterako Reina Sofia ospitaleko Larrialdien Ataleko burua, Lizarrako Garcia Orcoyen ospitaleko Larrialdien Ataleko burua eta SOS Nafarroako Ataleko burua.