Koldo Artolak idatzi du "Acerca de la llamada variedad de Arce (8- Algunas comparaciones con respecto a la variedad de Elcano)" ("Artzibarko aldaera deitu izanaren inguruan (8- Elkanoko aldaerarekiko zenbait erkaketa)") lana. Bertan, aurreko aleetan erabilitako zein inprimatutako hainbat iturritako datuak erabilita, eta L. L. Bonaparte printzearen dialekto-sailkapenari jarraituta, Artzibarreko eta Elkanoko aldaerak dituzten sei herritan jasotako hitzak eta horien hainbat alderdi aurkeztu ditu, alderatzeko eta zenbateraino datozen bat ikusteko.

"Sobre las características acústicas de las emociones básicas" ("Oinarrizko emozioen ezugarri akustikoez") Iñaki Gaminde, Urtza Garay, Aintzane Etxebarria eta Asier Romeroren lana da, eta gazte euskaldun elebidunek simulaturiko oinarrizko emozioak agertzean erabiltzen dituzten ezaugarri akustikoak azaltzen dira. Helburu nagusietako bat emozioen ezaugarri akustikoak ezagutzea izan da. Ama-hizkuntzaren eta informatzaileen jatorri geografikoaren arabera aldaera fonetikorik dagoen ala ez ere aztertu da. Ikerketa osoa gauzatzeko, euskaraz hitz egiten den eremu osoko 115 informatzaileren corpusa erabili da.

Julián Maia da "Evolución del orden de palabras en euskera: del idealismo ideológico al pragmatismo comunicativo" ("Euskal hitz-ordenaren norabidea: idealismo ideologikotik pragmatismo komunikatiborantz") lanaren egilea. Lanean esaten duenaren arabera, "kontaktuan diren hiru hizkuntzako gizartean moldatu behar dira euskal hiztunak (gaztelania/frantsesa eta ingelesa).  Gaztelania (edo frantsesa) eta ingelesa zabal garatutako hizkuntzak dira; euskarak, berriz, tradizio murriztua eta mugatua du hainbat esparrutan. Hori dela-eta, oraindik zehazteke daude euskararen erabilera batzuk". Euskal esaldietako elementuen ordenari dagokionez gaur egun hartu beharko litzatekeen norabideari buruz hainbat adituk dituzten iritziak jaso eta aztertzen dira; izan ere, prosa logiko-diskurtsiboan garapen nabarmena gertatzen ari da (adibidez, unibertsitateko hainbat jardueratan).

"Juan Arin Dorronsororen "Material Toponímico" argitaragabearen 25. paper-zorroa" izan da aldizkariko beste lanetako bat. Bertan, Luis Mari Zalduak Juan Arin Dorronsororen argitaratu gabeko toponimoen 25. karpetako edukia azaltzen du. Hala, Enirio-Aralarko toponimiari buruzko 1940ko krokisean jasotzen den informazioa osatu da.

Azkenik, "A Descriptive Analysis of Basque Hypocoristics" ("Un análisis descriptivo de los hipocorísticos vascos / Euskal hipokoristikoen azterketa deskriptiboa") da Patxi Salaberri Zaratiegi eta Iker Salaberri Izkok idatzitako artikuluaren izena. Euskaraz hipokoristikoak eratzeko modurik ohikoenak zeintzuk izan diren eta oraindik zeintzuk diren azaltzen dute, hipokoristikoak zehazten ahalegindu eta horien inguruko arazo terminologikoetako batzuk aztertu ondoren. Onomastikaren alorra oinarri egin da lana, nahiz eta gaiaz arduratu izan diren fonologo batzuen hainbat lan aipatzen diren.

350 aleko argitalpena salgai dago, ale bakoitza 8,50 euroren truke.