Nafarroako Lehendakari Yolanda Barcina Angulok gaur, ostirala, iragarri du Foru Gobernua helburuen araberako urte anitzeko finantzaketa-plan baten garapenean lanean ari dela, unibertsitateari "behar adinako zuzkidura ekonomiko egonkorra" bermatzeko. Nafarroako Unibertsitate Publikoko (NUP) 2014-2015 ikasturtearen irekiera-ekitaldian esan du hori.

Lehendakariak bere agerraldian esan duenez, duela lau urte unibertsitateari "errealitateak Nafarroako gizarteari ezarri zion herstura partekatzen ahalegintzeko" eskatu bazion, "gaur ikuspegi berri bati hasiera ematen diogu, eta ikuspegi horrek orain arte planteatu ezin zitezkeen helburu batzuk bilatzeko aukerak emango dizkigu".

Nolanahi ere, azaldu du beste finantzaketa-iturri batzuk bilatzea "erronka bat izan behar dela" unibertsitaterako. Alde horretatik, itxaropentsu agertu da indarrean jarritako lege-mailako berrikuntzekin (Mezenasgoaren Lege berria, esaterako) "kanpoko baliabideak erakartzea sustatuko dutelako". Gaur egun, NUPen diru-sarreren % 80 finantzaketa publikotik dator.

Bestalde, Lehendakariak ikasle nafar guztientzako aukera-berdintasunaren printzipioa babestu du. Puntu horretan, hori lortzeko Foru Gobernuak sustatutako hainbat neurri zerrendatu ditu, adibidez: dibertsitateari emandako arreta, PAI programa eta ingelesaren irakaskuntza Nafarroako beste 30 ikastetxeetara zabaltzea eta "jarrera propio eta sozial bat" bekak emateko orduan.

Atal honetan, NUPerako prezio publikoak ikasturte honetarako "ez direla aldatu" nabarmendu du eta, gainera, behar handieneko ikasleentzako laguntzak handitzen direla.

Lehendakariak jarrera hori ondorengo ideia honekin justifikatu du: hezkuntza "Nafarroako proiekzio ekonomiko eta soziala oinarritu daitekeen aurrerapen, bizikidetza eta etorkizunerako baliabide onena da". "Funtsezko arrazoi horrengatik nire Gobernuak itzulerarik gabeko apustu bat eginda dauka hezkuntza-kalitate, zuzentasun eta aukera-berdintasunaren alde", aipatu du.