Gazako zerrendako giza larrialdietarako Nafarroako Gobernuak emandako laguntza, 26.286 euro, inguru horretan udan honetan izandako gatazkaren ondorioz desplazatutako palestinarren artean elikagaiak banatzeko erabiliko da.

Banaketa hori Ekialde Hurbileko Palestinako Errefuxiatuentzako Nazio Batuen Agentziak egingo du (UNRWA); elikagaien familia-paketeak desplazatuen aldi baterako beren harrera-zentroetan banatuko ditu, bi anoa eguneko, eta, hari esker, Munduko Osasun Erakundeak gomendatutako biziraupenerako gutxieneko kaloria-beharrak asebeteko dira.

Zehazki, giza larrialdietarako laguntza horrekin, lau astez 226 bat lagunentzako elikagaiak erosi eta banatu ahalko dira (bost kidez osatutako 45 familia), eta kopuru horretatik ia erdia adin txikikoak eta 111 emakumeak direla kalkulatzen da.

Pertsona bakoitzak sorta bat jasoko du, bi anoekin –eguneko bi otordutarako– honako elikagai hauekin, esaterako: zortzi ogi, hamar datil, haragi-lata bat edo ontziratutako atunarena, bi esneki, lau te-poltsa, hiru litro ur mineral, bi tomate (astean hiru aldiz), bi pepino (astean hiru aldiz) eta sagar bat (astean hiru aldiz).

Elikagai-pakete horren asteko kostua 35 dolar da pertsonako; nolanahi ere, alda daiteke elikagaien prezioen gorabeherengatik eta dibisen aldaketa-motagatik. Dena den, Nafarroako Gobernuaren laguntza elikagaiak erostera mugatuko da ia, proiektu hori burutzeko beharrezkoak diren gainerako kostuak (erosketarako lizitazioa, banaketa, kontrola…) UNRWAren aurrekontu erregularraren kargu geratuko baitira.