60.394 erromes igaro dira aurtengo urtarriletik iraila bitarte Orreagako aterpetxe nafarretik; 2013ko aldi berean, berriz, 59.057 izan ziren. Aurtengo erromes-kopuru horretatik, 19.669 Estatukoak dira eta 40.725, atzerritarrak.

Urteko hurrengo hilabeteetan joera horrek jarraitzen badu, bisitarien kopurua gaindituko da berriz: 2013an, 63.916 izan ziren, eta 57.606, 2012an. Horrela adierazten dute Espainiako Bide Frantsesaren sarreran dagoen Orreagako Aterpetxeko datuek.

Erromesek Nafarroa udako hilabeteetan, ekainean nahiz uztailean, zeharkatu dute batez ere, eta atzetik datoz maiatza eta abuztua; azken bi hilabete horietan atzerriko erromes asko batzen da beren oporraldiak baliatzen dituztenak Santiago bidea egiteko. Haien artean, frantsesak, italiarrak eta alemanak dira gehienak, eta bereziki Italiatik etorritako erromes-kopurua apur bat igo egin da.

Aipagarria da erromes korearrak eta iparamerikarrak beren presentzia bikoiztu zutela Santiago bidean, Nafarroatik igarotzean, 2013. urtean, Hego Koreako Kim Hyo Sun idazle eta kazetariak idatzitako best-seller-agatik eta AEBetako The Way pelikulagatik, Martin Sheen protagonista duena.

Hala, egiaztatu da, azken urteotan kultura eragin handia izaten ari dela Santiago bideko erromesen jatorrian. Duela urte batzuk bidaiari brasildarrek Santiago bidearekiko interesa areagotu zuten Paulo Coelhok idatzitako nobelaren ondoren, eta baita alemanena ere Hape Kerkeling-en liburua argitaratu ondoren; 2013an, berriz, iparramerikarren txanda izan zen, eta neurri txikiagoan, Hego Koreako erromesena.