Nafarroako Turismo Kontseiluak Noain-Iruña aireportuko arduradunekin lan egingo du ekintza-plan bat egiteko, instalazio horien turismo-erabilera hobetzeko asmoz, horretarako zenbait ekintza eginez, esaterako: bidaiarien joan-etorriak aztertzea edo turismo-pakete konbinatuak eskaintzea.

Sánchez de Muniáinek Nafarroako Turismo Kontseiluaren erabaki nagusien berri eman du prentsaurrekoan, eta organo horretako kideei ere 2012-205 aldirako Turismoko Plan Integrala aurkeztu die eta baita turismo-egoeraren datu adierazgarrienak ere. Zehazki, azpimarratu du urte honetan, orain arte, bidaiarien kopuruak % 9 egin duela gora, gaualdiek % 7,4, eta atzerriko turismo-gastuak % 28,9.

Azkenik, kontseilariak turismo-jarduera antolatzeko eta ikuskatzeko Batzordeak orain arte egindako lanen berri eman du; batzorde hori legez kanpoko turismo-ostatuen aurkako ekintzak areagotzeko sortu zen. Zehazki, 10 zehapen-espedientea zabaldu dira eta beste 13 zabalduko dira laster.

Alde horretatik, Sánchez de Muniáinek adierazi du Nafarroako Gobernuak turismoko establezimenduei honako hau eskatu nahi diela: beren erregistro-zenbakia sektoreko webguneetan argitara dezatela.

Aireportuaren turismo-erabilera sustatzeko batzordea Aireportuko Koordinazio Batzordean iragan martxoaren 24an hasitako bilkuren ondoren sortu zen. Hitzordu horretan erabaki zen ekintza-plan bat sustatzea, lehen jarduera modura, eta ekintza horren helburua aireportuaren inguruko turismo eta enpresa-jarduera bultzatzea izango zen.

Aipatutako planaren barnean, sustapen hori egiteko hiru lan-talde sortzea aurreikusi zen: instituzionala, enpresa-mailakoa eta turismo-jarduerakoa.

Turismo eta Merkataritzako Zuzendaritza Nagusia bilkura orokorretan nahiz talde instituzionalaren bilkuretan parte hartu du; eta azken horrek ekainaren 26an egindako bilkura batean, Nafarroako Turismo Kontseilu guztia gonbidatu zuen kezkak bateratzeko eta behin betiko taldeak osatzeko asmoz.

Bestalde, urriaren 8an talde instituzionala bildu zen, eta inplikatutako solaskideen organo ordezkari bat izateko beharraz aritu zen (foru-gobernua, enpresak, konpainiak, erakunde publikoak, turismo-eragileak eta aireportua) aireportuaren inguruko turismo nahiz enpresako jarduera sustatzeko egin daitezkeen ekintza guztiak kudeatzeko.

Departamentuak aireportuko zuzendaritzari eskaera egin zion berriz ere hirugarren lan-taldea (turismokoa) Turismo Batzordearen barnean sortutako berariazko batzorde batekin egokitu zedin.

Horren emaitza da, gaur Turismo Kontseiluaren berariazko batzorde hori proposatu dela, eta aireportuko ekintza-planean aurreikusitako hirugarren lan-taldearekin bilduko dela.

Kontseiluaren bilkura horretan, gainera, Milagroko Gereziaren Eguna Eskualdeko Turismo Interesa duen Jai izendatzea proposatu da. Horrenbestez, Milagroko nekazaritza-tradizioa eta udalerrian ekoitzitako askotariko nekazaritza-produktuak ezagutzera eman eta sustatu nahi dira nafarren artean eta beste autonomia erkidegoetako turisten artean.

Eskatutako baldintzak betetzen direla egiaztatzean, Antolamendu Zerbitzuak izendapen horretarako aldeko txostena egin zuen Foru Agindu baten bidez, eta gaur Nafarroako Turismo Kontseiluaren txostenak berretsi du.

Orain arte, 10 ospakizun izendatu dira "Nafarroako Turismo Intereseko Jaiak". Izendatutako dataren arabera ordenatuta: Hiru Behien Zerga, Ituren eta Zubietako Inauteriak, Lantzeko Inauteriak, Faltzesko Piloneko Entzierroa, Altsasuko Inauteriak, Artaxonako historiarekin Hitzordua, Uharte-Arakileko Artzain Eguna, Errege Magoen Autoa (Zangoza), Lakarko Batailaren Ospakizuna eta Lodosako Sokadun Zezena.