Teknikariek eta langileek osatutako 380 pertsona eta, elurra kentzeko 129 makina, laguntzeko 87 ekipo eta 5 turbofresa ariko dira lanean Nafarroako Gobernuak 2014/2015 kanpainarako errepide nafarretan abian jarriko duen Neguko Bidezaintza Planean. Hala adierazi du gaur goizean Zarraluqui kontseilariak; hark denboraldi berrirako aurreikusitako jarduerak eta jarduera-irizpideak aurkeztu ditu Lizarrako Kontserbazio Zentroan eta, horrekin batera, 2013/2014 kanpainaren balantzea egin du.

Kontseilariak nabarmendu duenez, azken kanpainan aurrekoan baino 16 egun gehiagotan egin zuen elurra (50 egunetan; aurrekoan 34 egunez egin zuen), baina prezipitazioak intentsitate txikiagokoak izan ziren eta maila handiagoetan egin zuen. Izan ere, gaur goizean azaldu denez, elur-prezipitazioko egun gehiago izan arren, askoz ordu gutxiagotan egin zen lan (20.267 ordu; aurrekoan 30.513 ordu), % 26 gatz gutxiago isuri zen (14.370 tona; aurreko kanpainan, 19.516) eta kostua % 34 jaitsi zen (3,4 milioi; aurreko kanpainan 5,2 milioi)

Prezipitazio gehienak azaroko bigarren hamabostaldian jaso ziren eta urtarrilean nahiz otsailean; neguaren eragina asko jaitsi zen abenduan eta martxotik aurrera. Iragan negu-denboraldiko alderdi aipagarri bat elurteak maila altuetan batu zirela izan zen, eta horrek zirkulazioari gutxiago eragitea ekarri zuen eta, hortaz, beste urte batzuetan baino gorabehera gutxiago egotea. Nolanahi ere, 1.000 metrotatik gora aurreko negu batzuetan baino elur-egun gehiago bota zuen, nahiz eta lodiera txikiagokoak izan.

Kontseilariak azpimarratu du Nafarroak duen dispositiboa Estatuko batez bestekoaren gainetik dagoela, eta hori agerian geratzen da informazioa beste autonomia erkidego batzuekin partekatzean, baliabideetan nahiz erabilitako teknologian. Azken alderdi horretan, azaldu du elurra kentzeko ibilgailu guztiek dispositibo berezi bat dutela eta, haren bitartez, non dagoen jakiteaz gain, martxan dauden edo ez, edo bakoitzak zenbat gatz isuri duen jakin daitekeela.

Koordinazioko jarduerak

Ekintza Sustapen Departamentuko Errepideen Kontserbazioko Kontrol Zentrotik koordinatzen da, hura urteko egun guztietan eguneko 24 ordutan artatzen da, eta honako hauek kudeatzen ditu: Nafarroako Errepide Sare guztian jarritako 303 kamerak, 31 meteorologia-estazio, informazioa aldagarriko kanpoko 60 taula eta barneko 24 tuneletan eta bideen kontserbazioa artatzen dituzten ibilgailu guztietako GPSak.

Zentroak errepide-sareko gertakariak hautematen ditu eta jarduera-tokitik hurbilen dauden baliabideak mugitzeko agindua eman eta koordinatzen ditu.

Jardueren barnean sartzen dira, Planean berariaz parte hartzen duten giza baliabideak eta baliabide materialak koordinatzeaz gain, Errepideen Sareko Kontserbazio Zerbitzu, SOS Navarra/ Foruzaingo, Guardia Zibil eta alor horretan Araba nahiz Gipuzkoako arduradunen arteko koordinazio operatiboa; azken horiekin ere lan egiten da errepide komunetako gertakarietarako eta, bereziki, A-15 Leitzarango Autobian eta A-1 Iparraldeko Autobian gertatzen diren gorabeheretarako.

Koordinazioa, halaber, Iruñeko Udaleko Babes Zibilera zabaltzen da, errepide garrantzitsuenekin lotzen diren hiriburuko irteeran zirkulazioa errazte aldera: A-21 Pirinioetako Autobia, PA-30 Iruñeko Ingurabidea, PA-31 Iruña Hegoalde eta aireportuko sarbidea, PA-32 Iruña Hego-ekialdeko sarbidea, PA-34 Iruña Mendebaldeko sarbidea, N-240-A Iruña-Gasteiz eta A-12 Donejakue Bideko Autobia.

Pirinio Atlantikoetako Kontseilu Orokorraren eta Nafarroako Gobernuaren elurra kentzeko ekipoen zerbitzuak ere koordinatu egingo dira lan horiek burutzeko N-132 (Frantzian) eta NA-137 (Nafarroan) errepideetan, Pierre Saint-Martin/Belaguako mendatean. Azken errepide horretan etengabeko dispositibo bat dago, eta, haren bidez, mendatea artatuko da egoerek hala egitea eskatzen dutenean, 07:00etatik 19:00etara, neguko kanpainako egun guztietan. Inguru horretan elur-jausien arriskuak jarraitzeko kontratatutako laguntza teknikoa ere badago.