Gaur egun garapeneko lehen faseetan dauden oinarri teknologikoko 7 enpresa nafar NEOTEC INNVIERTE Foroaren 13. edizioan parte hartzen ari dira gaur, Iruñean. Inbertitzaileekin egindako Estatuko ekimen bat da, Espainiako eta nazioarteko arrisku-kapitaleko enpresak dira bereziki eta baita berrikuntzari lotutako beste inbertitzaile eta ordezkari instituzionalak ere.

Enpresek beren ideia berritzaileak aurkeztu dituzte, beren enpresa-proiektua garatu eta finkatzeko beharrezko finantzaketa lortzeko xedearekin.

Guztira, bilkuran Espainia osoko 16 enpresa parte hartzen ari dira, eta haien jarduera IKT, arlo biosanitario eta beste teknologia batzuetan oinarritzen dira. Enpresa horiek aurtengo edizio honetara aurkeztutako 68 proiektuen artetik (21 nafarrak ziren) aukeratu ziren. Hautaketan, garatzeko eta hazteko zer ahalmen duen aintzat hartu da, zuzendaritza-batzordearen gaitasuna eta garatu behar dituzten produktu edo zerbitzuen berrikuntza-maila.

Garapen Teknologiko Industrialerako Zentroak (GTIZ) sustatutako eta Nafarroako Gobernuak nahiz Sodenak antolatutako foroa gaur, egun osoz egingo da CEINen egoitzan; irekiera-ekitaldian, lehen lehendakariorde eta Ekonomia, Ogasuna, Industria eta Enpleguko kontseilari Lourdes Goicoecheak esku hartu du, eta baita Zientzia, Teknologia eta Berrikuntzako idazkari nagusi María Luisa Poncelak ere.

Goicoechea lehendakariordeak egindako agerraldian, azpimarratu du "foru honetan Nafarroak zer partaidetza handia izan duen eta baita bertako zenbat proiektu hautatu diren ere; izan ere, 7, hautatuen erdia ia, Foru Komunitatekoak dira". Goicoecheak enpresa nafarren dinamismoa nabarmendu du eta kanpo-finantzaketa lortzeko duen "ahalmen handia"; horrekin batera, beren negozio-planen kalitatea eta berrikuntzarako gaitasuna goraipatu ditu. Gogoratu behar da, NEOTEC Foroaren aurreko edizioetan, 2 proiektu nafar baino ez zirela aurkeztu, eta bietako bat ere ez zutela hautatu.

Bestalde, Zientzia, Teknologia eta Berrikuntzako idazkari nagusi María Luisa Poncelak nabarmendu duenez, "urtero NEOTEC INNVIERTE Forora etorritako enpresek historikoki erakutsi dute, dituzten ezaugarri eta espiritu berritzaileagatik inbertitzaileen kapitala jasotzeko egokiak direla. Izan ere, gaur arte aurkeztutako 196 konpainia teknologikoetatik, % 30 inguru inbertitzaileek babestu dute eta, batez beste, milioi bat euro lortu dute urtebete baino lehen Foro bakoitza antolatzen denetik".

Aipatu denez, aurtengo forora Nafarroako 21 proiektu aurkeztu dira, eta haietatik 7 hautatu dira izan daitezkeen inbertitzaileen aurrean beren planak aurkez ditzaten. Oinarri teknologikoa duten 7 enpresa nafar dira eta izaera berritzaile handikoak: New Music Now, laneko sistema integrala garatu eta merkaturatzeaz arduratzen da tabletetan partitura digitalak dituzten musikarientzat; Gogotick-ek mugikorretarako zerbitzua ematen du, eta haiekin erabiltzaileek doako aplikazio bat jaitsi eta bezeroek ekitaldiak pertsonalizatzeagatik ordaintzen dute; Geoactio-Alestis Consulting-ek irtenbide teknologikoak garatzen ditu eta haiek hainbat sektoretako konexio nahiz mugikortasunera bideratuta daude; Gettin Robotika forjaketa eta galdategiaren sektorean robotizatutako zelulak garatzeaz eta ezartzeaz arduratzen da; IDEN Biotechnology-n teknologia eta irtenbide aurreratuak (bioteknologia) garatzen dituzte nekazaritza-ekoizpenaren kalitatea eta errendimendua hobetzeko; Innoup Farma-k sendagaiak eta osasun-produktuak ikertu eta garatzen ditu nanoteknologia erabiliz; eta Formune, bioteknologia-enpresa bat da, eta infekzio biralei eta minbiziari (cervixeko minbizia) aurre egiteko txerto terapeutikoak garatzeaz arduratzen da.