Ez da adopzioaren baliokide

Familiako harrera aldi baterako neurri bat da, eta adingabearen babes eza eragin duen arrazoia desagertu arte erabiltzen da (arreta falta, utzikeria, tratu txarrak, gehiegikeriak…) eta hura, ahal bada, jatorrizko familiara itzultzen den arte. Kasuen arabera, harrera-familiako egonaldia hiru hilabetetik adingabeak adinez helduak diren arte luza daiteke ere.

Aipagarria da harrera ez dela adingabe horien adopzioaren baliokide. Are gehiago, haurrak beste familia batean egiten duen egonaldian bere jatorrizko gurasoak izaten jarraitzeaz gain, jatorrizko guraso horiek haurra bisitatuko dute araubide bati jarraiki.

Familia hartzaileek funtsezko baldintza batzuk bete beharko dituzte, esate baterako: familiakideei maitasuna eta laguntza emateko gaitasuna, ondo integratutako egitura izatea, arau sozialak eta balioak igortzeko gaitasuna izatea edo adingabea integratzeko ingurune egokia izatea (familia zabala, adiskideak, auzoa…). Gainera, familia hartzailearen motibazioa elkartasunean oinarrituta izango da eta ez gabezia afektibo edo ekonomikoetan.

Behar besteko heldutasuna eta egonkortasuna duten gizabanako edo bikoteak izan beharko dute ere, osasun ona, bizitza egonkorra eta behar adina baliabideak dituztenak. Beharrezkoa da Nafarroan bizitzea, adingabearen egoera berezietan salbu, babes-sistemako profesionalei laguntzeko jarrera erakustea, haurraren historia pertsonala errespetatzea eta haren familia biologikoarekiko harremanak onartzea.

Azkenik, beharrezkoa da familiek adingabea zaindu eta hezteko erantzukizuna onartzea, behar beste denbora izatea eta argi izatea azken helburua ez dela haurra adoptatzea.

Familia hartzaileentzako laguntzak

Familia-harrerak zailtasun batzuk izan ditzake, adibidez: adingabeen bizipenei aurre egitea, haien gurasoen bisitak edo familia-hartzaileek askatasunik ez izatea haurrekiko edozein erabaki hartzeko.

Arrazoi hori dela-eta, eta harrera-aldiak irauten duen bitartean, Nafarroako Gobernuak familia-hartzaileei laguntza teknikoa eta beharrezko prestakuntza eskaintzen dizkie, prozesua hasi aurretik nahiz amaitzean.

Gainera, hilero konpentsazio ekonomiko bat ematen zaie harrerako gastuak arintzeko eta baita aparteko beste batzuk ere, zerbitzu publikoek estali gabeko eta izan daitezkeen ebakuntza edo tratamenduei aurre egiteko.

Jardunaldia gaur arratsaldean

Bestalde, Nafarroako Gobernuak adingabe eta helduentzako jardunaldi bat egingo du gaur arratsaldean, 18:00etan, Iruñeko Kondestableko Jauregian. Jardunaldi horretan, familia bat izatearen garrantziaz arituko dira, batez ere babesik gabeko egoeran dauden haurrentzat. Sarrera doan da aretoa bete arte.

Haurren Eskubideen Nazioarteko Eguna dela-eta antolatutako jardunaldiaren barnean, Javier Urra psikologoak "Haurrek ez dute mugarik" izeneko hitzaldia emango du; Haurraren Eskubideen Adierazpenaren irakurketa musikala ere ikus-entzun ahalko da eta ipuin nahiz marrazkien eskola-lehiaketako sari-banaketa egingo da ere.