Nafarroa bere hornitzaileei epearen barnean ordaintzen dien Foru Komunitate bakarra da, Ogasun eta Administrazio Publikoen Ministerioak egindako txostenaren arabera. Txoten horretan azpimarratzen denez, Foru Komunitatea, 23,94 eguneko batez bestekoarekin, kontratuen legeak finkatutako mugaren 6,06 egun azpitik dago, hau da, Espainiako batez bestekoaren herena da (72,89 egunetan finkatuta dago).

Administrazio Zentralak administrazio publiko guztien (Estatua, Gizarte Segurantza, Autonomia Erkidegoak, eta Toki Korporazioak) ordaintzeko batez besteko aldiaren datuak (PMP) lehen aldiz argitara eman ditu, eta datu horiek aldizkakoak izango dira hemendik aurrera, gardentasunaren printzipioa aplikatuz. Txostenaren helburua da, herritarrek eta hornitzaileek jakin dezaten erakunde bakoitzak legeak agindutako gehieneko epea betetzen duen edo ez. Administrazioek datu horien berri emateko betebeharra uztailaren 25eko 635/2014 Errege Dekretuan finkatuta dago.

Ministerioko datuak

Ministerioak jasotako iraileko datuen arabera, Nafarroaren ordainketa-aldiaren batez bestekoa 23,04 egunekoa da; indize horrek adierazten du, egiaz ordaindutako fakturen (36,31 eguneko batez bestekoa Foru Komunitatean) ordainketa-denboraren eta oraindik ordaintzeke dauden fakturen (22,11 egun) "antzinatasuna"-ren arteko batez besteko haztatua

Zifra horien arabera, Nafarroa da fakturak 30 egunetan ordaintzen duen eskualde bakarra, eta Espainiako batez bestekoaren oso azpitik dago (72,89 egun). Foru Komunitatearen ondoren, ordaintzen puntualenak EAE (34,09 egun), Kanariak (37,38 egun) eta Galizia (41,34 egun) dira. Beste muturrean Aragoi dago; zordun handiena da, 107,53 eguneko batez bestekoarekin.

Ministerioaren txostenaren arabera, bederatzi autonomia erkidegok (Andaluzia, Balear Uharteak, Gaztela Mantxa, Katalunia, Aragoi, Extremadura, Murtziako Eskualdea eta Valentziako Erkidegoa) berankortasun-alorreko araudiaren atzerapen handieneko epea gainditzen dute; epe hori 30 egunekoa da kontratuen legean (hau da, faktura aurkezten denetik 60 egun) ezarritako epea amaitzen denetik (beste 30 egun).