Aurizberri, Barañain, Martzilla, Noain eta Vianako liburutegiek XV. María Moliner Irakurtzera Animatzeko Kanpainaren sariak jaso dituzte. Ekimen hori Hezkuntza, Kultura eta Kirol Ministerioak, Espainiako Udalerri eta Probintzien Federazioak (FEMP) eta Coca-Cola fundazioak antolatzen du, eta, haren bidez, udal-liburutegiek erabiltzaileentzako doako jarduerak antolatzen egindako ahalegina saritzen da.

Sari horrekin zentro horiei haur eta gazteen literaturako 180 tituluk osatutako sorta bat ematen zaie honako proiektu hauengatik: "Gurpil gaineko irakurketak" (Aurizberriko liburutegia), "Hamar urtez Afrikatik mugitzen…Barañainen" (Barañaingo liburutegia), "Martzillako liburutegi publikoa: elkargune bat" (Martzillako liburutegia), "Irakurtzearen balioa (erantsia)" (Noaingo liburutegia) eta "Liburutegi publikoan, denetarik denentzat!" (Vianako liburutegia).

XV. María Moliner Irakurtzera Animatzeko Kanpainak 12.00 euroko sari bereziak eman dizkie Soto del Barcoko Ildefonso Fierro Ordóñez (Asturias), Jaramako El Pilar de Fuente el Saz (Madril) eta Torre Pachecoko (Murtzia) liburutegiei.

1997. urtetik, Aurizberriko liburutegiak Berragu izeneko etxez etxeko liburu-maileguaren zerbitzua ematen du. Aezkoa, Artzi, Erro, Luzaide, Auritz eta Aurizberriko 400 erabiltzaile baino gehiagok beren etxeetan bertan alea jasotzeko abantaila dute. Hamazazpi urte baino gehiagoz funtzionatzen ari den onura horrek liburutegiko zerbitzuen erabilera erraztea du xede geografikoki oso sakabanatuta eta zahartutako biztanleria duen zonalde batean.

Mailegu-proiektuak Berragu izena hartu zuen, eta izen horrek Aurizberriko mendi bati egiten dio erreferentzia. Banakako erabiltzaileen etxeez gain, liburu-maileguak ere zerbitzua honako hauei ere ematen die: udalerrietako eskolei, Irati Irratiari edo Ama Ibañeta adinekoen egoitzari. Talde horiek aldi berean 50 ale hartzeko aukera dute, bai eta ikus-entzunezko 25 euskarri edo aldizkari ere. Liburutegiak ibilbideak finkatu ditu eta astean behin, Mari Mar, liburuzainak, lau ibilbide osatzen ditu udalerri bakoitzean materiala uzteko: hilean 250 bat kilometro.

Barañaingo Liburutegi Publikoa: "Hamar urtez Afrikatik mugitzen"

2014. urte honetan Barañaingo liburutegiak "Afrikatik mugitzen gara" elkartasun-jardunaldien hamargarren edizioan parte hartu du era aktiboan. Ekimen hori liburutegi horrek jarri zuen abian 2005ean, eta udalerriko hainbat talde nahiz elkartek parte hartzen dute bertan, bai eta zenbait udal-zerbitzuk ere.

Jardunaldien ekitaldi nagusia urtero ekainean antolatutako erabilitako liburuen azokatxo solidarioa izaten da, eta jardunaldi horiek helburu bikoitza dute: alde batetik, Nakupenda Africa elkarterako funtsak biltzea; egoitza udalerri horretan duen GKE da, eta Afrikako hainbat herrialdetako lankidetza-proiektuei laguntzen die. Bestetik, herrialde horietako errealitate eta arazoen gainean herritarrak sentsibilizatu nahi dira. Arrazoi hori dela-eta, denbora horretan guztian, hitzaldiak, mahai-inguruak, egile afrikarren nobelei buruzko irakurketa-klubak, zine-forumeko zikloak, heldu nahiz haurrentzako narrazio-saioak, kontzertuak… antolatu dira.

Hasiera batean, salgai jartzen dira: bigarren eskuko liburuak, Udalaren tailerretan egindako zeramikazko objektuak, bigarren eskuko jostailuak (guraso elkarteek egiten dute), eta proiektuetan lan egiten duten (horietarako dirua biltzen da) Guraso Zuriek beraiek emandako eskulangintza afrikarreko objektuak. Pixkanaka beste erakunde batzuk gehitu zitzaizkien, esaterako: Barañain Auditorioa eta Musika Eskola, eta arratsalde guztian kontzertu eta erakustaldiak egiten dituzte jendea azokatxora erakartzeko. Ludotekek txikienentzako jokoak antolatzen dituzte, auzoko gazte-taldeek rap-a abestuz edo hip-hopa dantzatuz parte hartzen dute, edo paperezko errotatxoak eginez (Santa Maria parrokiko katekesi-taldeak arduratzen dira); haiek doan banatzen dira eta kanpainaren ikur bihurtu dira. Iaz, gainera, Alaitz institutuko ikasleek txikienei ipuin afrikarrak kontatzeko eskaini zuten beren burua. Finean, liburutegiak antolatutako ekimen txiki bat da, eta herritarrek bertan parte hartzea lortu du.