Lehendakaritza, Justizia eta Barneko kontseilari Javier Morrásek 8. Zerbitzu Publikoen Kalitatearen Saria emango dio gaur arratsaldez Lizarrako García Orcoyen ospitalari Oftalmologiako itxarote-zerrendetan egindako kudeaketagatik. Izan ere, giza baliabideak eta aurrekontuak areagotu gabe, itxarote-zerrendak murriztu ditu, lehen kontsultan nahiz ondorengoetan, eta baita ebakuntzetan ere, eta itxarote-zerrenda horiek desagertzeraino heldu da.

Hala, ondorengo kontsultei dagokienez, itxarote-zerrendan 1.768 pertsona zeuden 2013ko otsailean, saritutako proiektua ezartzen hasi zenean. Egoera horrekin hitzorduak 14-17 hilabetez atzeratzen ziren adierazitako kontsulta-datarekiko. Planaren neurriak aplikatu ondoren, urte horretako abenduan itxarote-zerrenda 323 pertsonatara jaitsi zen, hau da, hasieran baino % 80 gutxiago, eta 2014ko apirilean zerrenda hori ezabatu zen, eta paziente guztiak adierazitako datan izango zuten kontsulta. Bestalde, lehen kontsultetako itxarote-zerrenda 10 egunekoa da.

Ebakuntzak egiteko itxarote-zerrendan, haietako gehienak begi-lausoen ebakuntzarako ziren; 2012ko otsailean 442 pazientek osatzen zuten zerrenda, neurriak aplikatzen hasi zirenean, eta zifra hori erdira jaitsi zen, 215 paziente, urte horren amaieran; 2013ko ekainean, berriz, 51 paziente baino ez zeuden. Aipagarria da kirurgia-prozesuan esku-hartzen duten zerbitzuek egoki funtzionatzeko (oftalmologia, harrera, anestesia, operazio-gelako erizaintza, laborategia…) beharrezkoa dela itxarote-zerrendan paziente batzuk izatea, berrogeita hamar inguru.

Itxarote-zerrenda horiek jaitsi dira giza baliabideak eta aurrekontuak areagotu gabe. Horretarako, zenbait neurri hartu dira, esate baterako: espezialisten artean paziente kronikoen berrazterketa-denborak adostea dituzten patologien arabera; pazienteen zerrenda berrazterketak egiteko denboren arabera mailatzea (sei hilabete, bederatzi edo urtebete) eta itxaroteko gehieneko denbora bat zehaztea tarteen arabera; oftalmologiarako operazio-gela gehiago ematea lan-ordutegiaren barnean ("peonatutako" deirik egin gabe); eta Harrera Zerbitzuarekin hilean behin biltzea kontsultak hitzartu aurretik, denbora errealean zer atzerapen dauden ikusteko eta hautemandako disfuntzioak ikusirik berehala jardutea.

Azkenik, itxarote-zerrendak kudeatzeko proiektu honen barnean, zentro horretako Oftalmologia Atalak hiru ikastaro antolatu ditu, 44 saio kliniko antolatu ditu beste batzuekin batera, eta beste prestakuntza-ekintza batean ere parte hartu du. Ekimen horiek honako hauei buruzkoak izan dira: teknologia berriak, glaukoma, kirurgiako tresneria, lehen mailako arreta, pediatriako larrialdiak, besteak beste.

Zerbitzu Publikoen Kalitatearen Sariaren banatze-ekitaldia gaur arratsaldean egingo da Nafarroako Bikaintasunaren Egunaren ospakizunean. Barañain Auditorioan egingo da, 19:00etatik aurrera. Nafarroako Bikaintasunaren Fundazioa erakunde publikoak antolatutako ekitaldi horretan, honako hauek ere parte hartuko dute: Osasunbideko zuzendari-gerente Cristina Ibarrolak eta Hezkuntzako kontseilari José Iribasek; azken honek 2014ko Nafarroako Bikaintasunaren Saria banatuko du.