Nafarroako Gobernuak bi eragiketa egin ditu azken bi egunotan bere zorraren zati bat berriz finantzatzeko eta 2014rako baimendutako defizitaren zati bat estaltzeko, 1992an zor-jaulkipenak egiten hasi zirenetik interes-tasa txikienekin.

Zehazki, 121 milioi euroko zor-jaulkipena egin da eta 15 milioi euroko mailegu bat kontratatu. Eragiketa horietan Estatuko lau banketxek parte hartu dute.

121 milioi euroko zorra hiru finantza-erakunderi ezarri zaie, epemuga 2023ko azaroa izanik eta % 2,033ko tasarekin. Aldiz, banku-mailegua 9 urteko epemugarekin hartu da eta % 1,983ko interes-tasarekin.

Ekonomia, Ogasun, Industria eta Enplegu Departamentuak jakinarazi duenez, eragiketa "oso ona" jo daiteke, finantza-kostuak "orain arte Foru Komunitatean lortutako txikienak baitira epe luzeko jaulkipen batean". Horrek erakusten du "finantza-merkatuek Nafarroan zer konfiantza duten". Finantza-kostu txikia lortzeaz gain, Nafarroa hornitzaileei bizkorren ordaintzen dien komunitatea da, Ogasun eta Administrazio Publikoen Ministerioak berriki argitaratu zuenez, eta "adierazle horiek Nafarroako Gobernuak zer finantza-kaudimen duen agerian uzten dute", adierazi dute Departamentuko ordezkariek.

Gogora ekarri behar da, ekainean Standard & Poor's (S&P) kalifikazio-agentziak Nafarroaren kreditu-kalifikazioa "BBB+" a "A –"-ra igo zuela. Agentziak berak dioenez, nota horrek argi erakusten du "Nafarroak finantza-konpromisoak betetzeko gaitasun handia duela"; hala ere, esan du, Nafarroako ekonomia "aurkako baldintza ekonomikoen eta egoeren aldaketen mende dagoela oraindik".

S&P agentziak egindako txostenak azpimarratzen zuen Nafarroak bi mailetako diferentzialari eusten diola Espainiak lortutakoaren aldean. Agentziaren arabera, hori gertatu da Foru Komunitateak "jarrera esportatzailea" duelako eta industria "lehiakor eta dibertsifikatua"; horrez gain, "finantza-kudeaketako historia ona du" eta baita "kreditu-kultura sendoa ere". Azkenik, S&P agentziak bere estatu konstituzional nahiz autonomia fiskal bereziaren kudeaketak Nafarroan zer eragin ona izan duen ere aintzat hartzen zuen.