Nafarroako Gobernuak, Sustapen Departamentuaren bidez, 270.000 euro erabiliko du 2015-2018 aldirako Foru Komunitateko errepide-sarearen bide-segurtasuneko hainbat azterketa egiteko. Urte anitzeko gastua izango da, eta urtero 67.500 euro banatuko da.

Horretarako, Obra Publikoen zuzendari nagusiari lanak kontratatzeko baimena eman zaio; haren zuzendaritza Sustapen Departamentuko funtzionario baten esku geratuko da, eta etorkizunean egin beharreko jarduerak zuzenduko dituen informazioa jasotzea du xede.

Lan horien barnean, honako jarduera hauek egingo dira: istripuak pilatzen diren bide-zatiak hautematea (TCA), hobetzeko ahal handia duten bide-zatiak hautematea (TAPM) eta baita motorzaleek istripu gehien dituzten bide-zatiak hautematea ere (TCAM); istripu-mailaren bilakaera aztertzea eta aurreko jarduerek zer eraginkortasun izan duten aztertzea; azterketan identifikatutako TCA bakoitza zehaztasunez analizatzea, hala badagokio; eta fauna basatia harrapatzearen ondoriozko istripu-mailen gune arriskutsuak identifikatzea; bai eta zolaren itsaspen-azterketa egitea ere sareko bide-zati kritikoenetan.

TCAen azterketa zehatzari eta bide-segurtasunaren azterketa egiteari dagokionez, honako hau da helburua: errepideko zer egoerek izan dezaketen eragina istripuetan. Horretarako, haietako bakoitza eta beren egoera zehatz-mehatz aztertzen da (galtzada-irteerak, oinezkoak harrapatzea, lehentasuna ez errespetatzea…), bai eta kasu bakoitzerako errepideak zer ezaugarri dituen ere.

Zehazki, ikuskatzen diren alderdiak ondorengoak dira: balizak, seinaleztapen bertikala eta horizontala, euste-sistemak, zeharbideak (gidariak hirialdeko pasabidea egoki ulertzen duen eta abiadura murrizteko elementuak behar bezala funtzionatzen duten), elkarguneak (diseinua, ikuspena, sarbideak), ibilbideak edo bideko errodadura-geruzaren egoera, azterketa modu berezian egingo diren alderdiak.