Ostiral honetan, urtarrilak 2, betetzen dira 125 urte Julian Gayarre tenore nafarra hil zela eta 25 urte Erronkariko haren Museo-etxea inauguratu zela, bere heriotzaren 100. urteurrenarekin bat eginez ireki baitzen.

Julian Gayarre Abesbatzaren emanaldiaren ondoren, agintariak, tenorearen senitartekoak eta herritarrak hilerrira joan dira, Gayarreren mausoleoaren aurrean lore-koroa jarri eta haren alde otoitz egitera.

Tenore nafarrari egin dioten omenaldiari amaiera emateko, "Lore bat Gayarrerentzat" ekitaldira joan direnek loreak jarri dizkiote eta abesbatzaren emanaldia izan da.

Oroigarrizko liburu bat sinatzeko aukera izan dute partaideek; liburu hori, gainera, urte osoan zehar egongo da Museo-etxean, bisitariek sina dezaten.

Bi urteurren horiek direla eta, larunbatean eta igandean, urtarrilak 3 eta 4, doan bisitatu ahal izango da Museo-etxea, ohiko ordutegian: larunbatean, 11:30etik 13:30era eta 16;00etatik 18:00etara; igandean, berriz, 11:30etik 13:30era.

Julian Gayarre (Erronkari 1844 – Madril, 1890) mundu mailako entzutea duen eta operaren historiako tenore onenetako bat da.

Tuteran (Nafarroa) egin zuen jendaurreko bere lehendabiziko aurkezpena zarzuela konpainia batean, 1867an, Sandoval izenaz.

1869an Milanon bizi zen eta Gelli maisuarekin ikasten zuen; Varesen debutatu zuen arrakasta handiz. Geroago, Italiako hiri askotan jardun zuen abesten.

Nazioarteko bere karreraren oinarrizko uneen artean, nabarmentzekoak dira honakoak: Buenos Airesko Colon Antzokiko debuta, 1876an; Londongo Covent Gardenekoa eta Madrilgo Errege Antzokikoa, 1877an; Italiarren Antzokian (1884) eta Parisko Opera Handian (1886). Errusiako eta Brasilgo eszenatokietan ere eskaini zituen emanaldiak eta Estatu Batuetan abesteko hainbat eskaintza errefusatu zituen.

Laringean zeukan arazoaren ondorioz, ezin izan zuen Madrilgo Errege Antzokiko 1889-90 denboraldia amaitu eta hiri hartan hil zen, 1890eko urtarrilaren 2an.

1989an sortu zuten Julian Gayarre Fundazioa: tenorearen familiako, Erronkariko Udaleko eta Nafarroako Gobernuko kideek osatzen dute fundazioa.

Fundazioaren hasiera bateko ondarea Julian Gayarreren ondorengoek emandakoak osatzen zuen: Museo-etxeak berak eta etxe hartan zeuden objektuek, Mariano Benlliurek egindako bere mausoleoa eta hiribilduko hainbat lekutan zeuden ondasunek.

Fundazioaren helburua da bere ondarea eta ondareari gehitzen zaizkion ondasun guztiak kontserbatzeko, babesteko eta zaintzeko lan egitea; baita horiek defendatzera, hedatzera eta ezagutaraztera bideratutako ekintzak eta programak betetzea ere, Fundazioaren funts artistikoen eta agiri-funtsen azterketarako eta ikerketarako bideak emanez eta Erronkariko tenorea oroitzeko eta omentzeko ekimenak sustatuz.

Julian Gayarreren Museo-etxea 1990eko urtarrilaren 2an inauguratu zuten, bere heriotzaren 100. urteurrenean; tenorearen aginduz 1879an eraikitako eraikinean kokatzen da, bere jaiotetxea izandako orube bertan; bere familiarentzako etxebizitza zen eta zeuzkan oporraldi laburretan joaten zen bera etxe hartara.

Beheko solairuan bere garaian kokatzen da Gayarre; kronologikoki erakusten da bere bizitza, agirien, argazkien, sarien, izendapenen, libretoen, partituren, oparien eta tenoreak bere bidaietan erositako hainbat objektu bereziren bitartez.

Museo-etxearen bisita osatzeko, Mariano Benlliure eskultorearen mausoleoa ere bisita daiteke, Erronkariko hilerrian.