Beste herrialde batzuetako hogei bat unibertsitariok parte hartu dute ikasturte honetako lehen lauhilekoan Borders Down programan (Mugak kendu). Programa horren bidez, irakaskuntzako goi-mailako atzerriko ikasleak inplikatzen dira DBH eta Batxilergokoko ikasleei hizkuntzak erakusteko, horretarako ikastetxeetan hitzaldiak emanez.

Aldi horretan, dozena bat herrialdetako hogei ikaslek guztira hogeita lau hitzaldi eman dituzte hamar zentro publiko eta itunpekoetan; ikasle horiek beren borondatez egin dute bat proiektuarekin.

Programa Hezkuntza Departamentuak sustatu du Nafarroako unibertsitate publiko eta pribatuekin nahiz Europako Foroko negozio-eskolarekin lankidetzan, eta ikasturte honetan hirugarren edizio betetzen du.

Ekimen honen bidez, programarekin bat egiten duten ikastetxeetan hitzaldiak ematen dira, eta bertan Foru Komunitateko goi-mailako ikasketak egiten dituzten beste herrialde batzuetako ikasleek, alde batetik, beren jatorrizko herrialdeetako kultur alderdi garrantzitsuen berri ematen dute, eta bestetik, Nafarroan zer esperientzia duten azaltzen dute, horretarako ikasleek ikasten duten atzerriko hizkuntza erabiliz, ingelesa normalean, baina baita frantsesa eta alemana ere.

Horrenbestez, beste kultura batzuk hobeto ezagut daitezke eta, aldi berean, beste hizkuntza baten ikasketan aurrera egin eta gazteen arteko boluntariotza-balioa sustatzen da.