Nafarroako Gobernuak koloneko minbiziaren detekzio goiztiarreko programa zabaltzeko abiarazitako sentsibilizazio-kanpaina 2014an Espainian egindako komunikazio-estrategia onenetako bat izan da, IPMARK aldizkari espezializatuak abenduko zenbakian jasotzen duenez.

50-69 urte arteko Nafarroako herritarrentzat programa 2013ko azaroan ezartzearekin batera (programaren helburua kolon eta ondesteko tumoreak hasierako faseetan detektatu eta kasuen % 90 sendatzea da), Foru Gobernuak zabalkunde eta sentsibilizazioko kanpaina bati ekin zion eta, haren xedea, atxikimendu- nahiz partaidetza-maila handiena lortzea zen.

Prebentziozko helburua erdiesteko (% 90eko sendatze-tasa), funtsezkotzat jotzen da biztanleria-jomugaren % 60aren partaidetza gutxienez; alde horretatik, eta programa zabaltzeko lehen urtearen ondoren, partaidetza-maila % 65,13 da prozesua jadanik osatu den guneetan, Espainiako eta Europako handienetako bat, hain zuzen. Gogora ekarri behar da, Iruñeko Etxabakoizko fase pilotuan, % 54ra heldu zela.

Ipmark-entzat 2014ko 60 bat publizitate-ekintzatan barneratutako komunikazio-kanpaina Gap´s publizitate-agentziak prestatu zuen. `Elige 90´ logo eta leloarekin, estrategiaren barnean iragarki orokorrak eta programaren hasierakoak sartu ziren hainbat gunetan, eta eskualdeko prentsan, online nahiz toki-aldizkarietan argitaratu ziren; iragarkiak emititu ziren, mikroespazioak eta programa berezi bat eskualdeko irrati-etxe guztietan; kanpo-publizitatea hiribusetan eta markesinetan; Elige90.es webgunearen sorrera; informazioko standak eta kartelak nahiz informazio-liburuxkak argitaratu ziren, eta haiek enpresetara bidali lantokietan zabaltzeko. Aipatu beharra dago, ehun bat enpresak dagoeneko kanpainarekin bat egin dutela, eta, hala, beren langileen artean programa hedatzen lagundu dute.