Zergen harmonizazioa

Batzorde negoziatzaileak zerga-arloan konpontzeke dauden auziak konpontzea ere adostu du: energia elektrikoaren ekoizpenaren balioaren gaineko zerga, eta kreditu-entitateetan gordailuak egiteari buruzko karga.

Energia elektrikoaren ekoizpenaren balioaren gaineko zergan, Nafarroako Gobernuak hura arautuko duen foru-legearen proiektu berri bat izapidetuko du, 2012an jadanik Foru Parlamentura bidalitakoaren antzekoa.

Gainera, Nafarroako Gobernuak zerga-arloan lege-aldaketa bat izapidetuko du ere, PFEZ eta Sozietate Zergan beste kenkari bat sortuko duena, Nafarroako zergaren salbuespenaz baliatzen ziren energia-ekoizle txikiek orain kenkaria erabiliz egin ahal dezaten. Onura fiskal hori 2013. urtetik egingo da atzeraeraginezko ondorioekin (urte hartan sartu zen indarrean zerga) eta, hala, Nafarroako zergadun bat bera ere ez da kaltetuko.

Kreditu-entitateetan gordailuak egitearen gaineko zerga ere, 2014ko martxoan onetsita, Estatuko legerian harmonizatuko da eta, horrenbestez, Estatuak oinarrizko gai horretan errekurtsoa aurkeztea saihestuko da. Nafarroako Gobernuak zerga harmonizatzeko lege-proiektu bat izapidetuko du, tasak lurralde erkidean finkatutako mugen barnean ezarriz. Kasu horretan, karga horretarako Estatuak iragan uztailean finkatutako tasa % 0,03koa izan zen, Foru Parlamentuak onartutakoaren tasa bera.

Bi zerga horiek adosteaz gain, batzorde nagoziatzaileak hidrokarburoen zergaren harmonizazioa egokitzea berretsi du. Egokitzapen formal bat da, hidrokarburoen zergan hidrokarburoen txikizkako salmenten zergaren integrazioari erantzuteko (2013. urtetik). Bi zergak harmonizatuta eta adostuta zeuden dagoeneko eta, beraz, une hauetan legezko aldaketari baino ez dira egokitzen.

Gainera, 27. artikulua aldatzea adostu da, taldeek Sozietateen gaineko Zergan ordaindu beharreko zergari buruzkoa; hala, existituko dira soIlik, Nafarroako araudia aplikatzeagatik zergak ordainduko dituztenak, eta Estatuko araudia aplikatzeagatik zergak ordainduko dituztenak.

Nafarroarako bermeak　

Itunaren batzorde negoziatzaileak Itun Ekonomikoaren artikulatua aldatzea erabaki du ere, zerga-arloko auzi-kopurua argitu eta murrizteko. Itunaren egungo testuan argibideak eta zehaztapenak egitea da kontua, Nafarroak duen erabateko zerga-gaitasuna bermatzeko, Espainiako Konstituzioak eta indarrean dagoen legeriak dagoeneko aitortzen dutena; haren aplikazioa, ordea, ezbaian jarri dira Konstituzio Auzitegiak berriki emandako bi epairekin, auzitegi horrek egindako interpretazioak sortutako arazoak direla-eta.

Aldaketek egungo testuaren 2. artikuluan jasotako Nafarroako zerga-gaitasuna azpimarratzen dute, esatean Nafarroak Itunean aipatzen ez diren beste zerga batzuk finkatu eta arautu ahal izango dituela. Orain indarrean dagoen testuak "itundutakoak" ez ziren zergei buruz hitz egiten zuen, eta horrek Konstituzio Auzitegiaren interpretazioan arazoak eragin ditu; izan ere, iritzi zuen itundu gabeko zergak Itun Ekonomikotik at zeudela, eta Nafarroak ez zuela haiek finkatzeko gaitasunik. "Aipatuta" hitzak interpretazioko muga hori ekiditen du.

Halaber, 6. artikuluak bi Administrazioen arteko koordinazioa eta lankidetza hobetzen du, estatuak zerga berriak onartzen dituenerako harmonizazioa arinagoa izan dadin, eta Nafarroak zerga-arloan duen arautzeko gaitasuna berma dadin. Hala, Estatuak zerga berri bat ezartzeko lege-proiektu bat aurkezten denean, batzorde koordinatzailea deituko dela ezartzen da, Ituna Estatuak proiektatutako zerga berri horri nola egokitu ebaluatu eta aztertzeko.　

Aldaketa horiekin batera, batzorde koordinatzaileari eraginkortasun handiagoa ematea aurreikusten da, eskumenen egikaritzea eskuordetzeko azpibatzordeak sortuz, eta baita beste hobekuntza batzuk sartzea ere foru eta estatuko ogasunen harremanean, bi administrazioen arteko informazio-bideak finkatzeko.

Batzorde negoziatzailean adostutako Itun Ekonomikoaren egungo lege-aldaketa horiek guztiak Nafarroako Parlamentura eta Gorte Nagusietara helaraziko dira orain, izapidetu ditzaten eta ondoren onartu, indarrean sartu aurretik.

Batzorde Koordinatzailea　

Aurrez, Itun Ekonomikoaren batzordea koordinatzailearen bilkura egin da ere. Itun Ekonomikoaren finantza-eragina aztertu da batez ere bertan, eta sektore elektrikoari buruzko zergetatik sortutako konpentsazioak eta finantza-fluxuak adostu dira; hidrokarburoen gaineko zergaren zerga-tasa autonomikoak aplikatzeagatik izandako finantza-harremanak; hidrokarburoei buruzko zergaren zerga-tasa autonomikoak aplikatzeari buruzko saldoen informazioa eta zehaztapena trukatzeko prozedura; hidrokarburoen gaineko zerga itzultzea profesionalek erabilItako gasolioan; kirol eta ongintzazko apustuengatiko konpentsazioak eta Estatuko hipika-apustuak.

Bestalde, Itunaren aldaketan izan daitekeen testuari buruzko azterketa bat hartu da, gas, petrolio eta trinkotuak ateratzeko balioaren gaineko zergari egokitzeko, gaur egun Gorte Nagusietan izapidetzen ari den lege-proiektu batean ezarritako figura.

Nafarroaren aldetik, batzorde koordinatzailean parte hatu dute: lehen lehendakariorde eta Ekonomia, Ogasun, Industria eta Enplegu kontseilari Lourdes Goicoecheak; Nafarroako Zerga Ogasuneko zuzendari-kudeatzaile José Raúl Goñik; Ekonomia, Ogasun, Industria eta Enplegu Departamentuko idazkari nagusi tekniko Pedro Ugaldek; Aurrekontuen zuzendari nagusi Juan Francok; Araudiaren Garapen eta Fiskalitate Zerbitzuko zuzendari José Javier Zabaletak; eta Itun Ekonomikoaren Zerbitzuko zuzendari Maite Dominguezek.

Estatuaren aldetik, honako hauek izan dira: Administrazio Publikoetako Estatuko idazkari Antonio Beteta; Aurrekontu eta Gastuen Estatuko idazkari Marta Fernández Curras; Ogasuneko estatuko idazkari Miguel Ferre; Aurrekontuen zuzendari nagusi Jaime Iglesias; AEATeko Plangintza eta Erakundeekiko Harremanen Zerbitzuko zuzendari Ángel Rodríguezek; eta Autonomien eta Tokiko Koordinazioko idazkari nagusi Rosana Navarrok.