Nafarroako Lehendakari Yolanda Barcinak eta "la Caixa" Bankuaren Fundazioko lehendakari Isidro Fainék akordio bat sinatu dute gaur, Iruñean. Akordio horrek gizarte-ekintzan, hezkuntzan, arlo zientifikoan eta ingurumenean bi erakundeen arteko lankidetza jasotzen du 2015. urterako. Urte honetan, finantza-entitateak Foru Komunitateko inbertsio soziala sendotuko du 13 milioi eurorekin, 2014an baino milioi bat gehiago.

Izenpetutako hitzarmenaren lehentasunen artean daude: gizarte-bazterketaren aurkako borroka; zailtasunak dituzten kolektiboen arteko enplegua sustatzea; adinekoek gizartean parte hartzea eta haien zahartze osasungarria; gaixotasun aurreratuak dituzten pertsonentzako arreta integrala; natura eta ingurumena babestea; eta kultura zabaltzea.

Sinatzaileez gain, hitzarmenaren izenpetzean izan dira: Nafarroako Gobernuaren aldetik, lehen lehendakariorde eta Ekonomia, Ogasun, Industria eta Enpleguko kontseilari Lourdes Goicoechea eta Aurrekontuen zuzendari nagusi Juan Franco, bai eta la Caixako zenbait zuzendaritzakide ere, haien artean, Bankuaren Fundazioko zuzendari nagusi Jaime Giró, edo Nafarroako lurralde-zuzendari Ana Díez.

Akordioa sinatu ondoren, Barcina Lehendakariak la Caixak zer-nolako sentsibiltate soziala duen azpimarratu du, eta hark emandako laguntza eskertu . Isidro Fainék, berriz, esan du, la Caixa sortu zenetik, lurralde bakoitzeko egiazko arazoei buruz kezkatzeko konpromisoa duela.

Proiektu nagusiak

Honako hauek dira programa nagusiak:

-Incorpora programa, zailtasunak dituzten kolektiboen arteko enplegua sustatzeari buruzkoa da. Enplegua aurkitzeko zailtasun bereziak dituzten pertsonak laneratzea du xede. Horretarako, laneratzaileen sare bat sortu da irabazi-asmorik gabeko erakundeekin hitzarmenak sinatuz; erakunde horiek alor horretan zailtasun bereziak dituzten pertsonak lan-munduratzeko egiten dute lan. Laneratzailea prestakuntza-prozesua zaintzeaz arduratzen da, eta onuradunei laguntza emateaz, izan daitezkeen gatazkak konpontzeaz eta enpresaburu berriak programari atxiki daitezen sustatzeaz. 254 lanpostu sortu zituen iaz Foru Komunitateko 45 enpresa berrirekin lankidetzan.

- Gaixotasun aurreratuak dituzten pertsonei eta haien familiei arreta integrala emateko programa. Programa honen helburua bizitzaren azken-prozesuan dauden pertsonen eta haien familien arreta-kalitatea hobetzea da. Horretarako, arreta integraleko taldeen sare bat sortzen da, eta honako hau eskaintzen du: laguntza emozionala paziente eta familiarrei, dolurako arreta eta zaintza aringarrietako taldeentzako laguntza. Gainera, programak profesionalentzako prestakuntza-eredu bat garatzea jasotzen du. Nafarroak diziplina anitzeko arretako talde bat du Iruñeko San Juan de Dios ospitalean, programa ezartzeko. Zentro horretan 437 paziente eta 622 familiar artatu ziren iaz.

- Adineko pertsonei lotutako programa. Haren helburua adinekoen partaidetza soziala sustatzea da, beren esperientzia balioan jartzea eta gure gizartean protagonistak izatea. Beste ekintza batzuen artean, adinekoen borondatezko lana eta teknologia berrietako, kulturen eta gizarteko proiektuetan prestatzea. 1.931 pertsonak hartu zuten parte iaz autonomia sustatzeko, zahartze osasungarrirako eta mendekotasuna prebenitzeko egindako 103 ekintzetakoren batean.