Nafarroak 126,1 milioi euro izango ditu guztira ekonomia suspertzeko eta enplegua hobetzeko. Kopuru horren erdia Europako funtsetatik dator, Europar Batasunak iragan abenduan behin betikoz onetsitako 2014-2020 programa eragilearen barnean.

Hala azaldu du lehen lehendakariorde eta Ekonomia, Ogasun, Industria eta Enpleguko kontseilari Lourdes Goicoecheak Eskualdeko Ekonomia eta Politikako Foroaren irekieran. Iruñean, gaur eta bihar egingo den Estatu-mailako hitzordua da, eta bertan izango dira: José María Piñeiro, Ogasun eta Administrazio Publikoetako Ministerioko Europako erkidegoko funtsen zuzendari nagusia, eta baita autonomia erkidego guztietako Europako funtsak kudeatzeko beste 60 bat arduradun ere.

2014-2020 programa eragileak Europako Batzordearen oniritzia jadanik jaso zuen (abenduan) lehen komunitatea da Nafarroa, Errioxarekin batera. Hura prestatzeko orduan, proposamena partaidetza publikoko prozesu baten mende geratu zen.

Programaren barnean, hazkunde adimentsu, iraunkor eta integratzailea errazteko bideratutako ekintzak sartzen dira, 2020 Europako estrategiarekin bat etorriz. Bi jarduera-ildo nagusi sartzen dira. Alde batetik, 86,7 milioi euroko inbertsioak, haien erdia Eskualde Garapeneko Europako Funtsak (EGEF) kofinantzatuta. Inbertsio horien xedea Nafarroako enpresa-sarearen hazkundea eta lehiakortasuna hobetzea da. Bestalde, 39,4 milioi euroko beste inbertsio bat dago, haren erdia ere Europako Gizarte Funtsarekin kofinantzatutakoa. Diru horrekin, lan-munduratzea sustatzeko eta ahulenen gizarteratzea indartzeko neurriak finantzatuko dira.

EGEF funtsen barneko inbertsioa lau jarduera-ardatzetan egingo da:

1.- Ikerketa, garapen teknologikoa eta berrikuntza sustatzea (43,9 milioi euro), Osasunbidean ikerketa indartzeko bideratutako jarduerekin; horrekin batera, diru-laguntzak ikertzaileak kontratatzeko, I+Geko kanpo-finantzaketa eskuratzeko, edo ETEetarako diru-laguntzak teknologia-zentroek emandako zerbitzuak kontratatzeko eta I+Geko proiektuak enpresetan bertan garatzeko.

2.- ETEen lehiakortasuna hobetzea. 28,7 milioi euro erabiliko da honako honetarako: enpresa-produktibitatea areagotzeko inbertsio nahiz proiektuei laguntzeko, enpresak batzeko nazioartekotu daitezen, edo aholkularitza espezializatuko zerbitzuak kontratatzea kanpoan ezartzeko, besteak beste.

3.- Ingurumena babestea. Kontzeptu horretarako, 4,1 milioi euro erabiliko da, karbono gutxiko ekonomia baterako urratsa errazteko (atmosferara isuritako gasak murriztea). Beste jarduera batzuen artean, etxebizitzetako inguratzaile termikoa birgaitzea diruz lagunduko da.

4.- IKTen erabilera eta kalitatea hobetzea, bai eta haiek eskuratzeko aukera ere (1,7 milioi euro). Osasun-atari baten garapena finantzatuko da teknologia berriek eskainitako aukera berriak ahalik eta gehien baliatzeko; hala, herritarrei eta gaixo kronikoei beren osasuna zaintzeko gaitasun handiagoak emango zaizkie.

Nafarroako Gobernuak aurreikusten duenez, 2023. urtean, jarduera horiek guztiek jadanik badiren 700 bat enpresa txiki eta ertaini mesede egingo die; berritzaileak diren ETE gehiago sortzea eragingo dute eta esportaziorako beste 400 enpresa berri izatea. Gainera, Nafarroako 342 enpresa ikerketa-zentrorekin lankidetzan ariko direla kalkulatzen da, eta 444 ikertzaileren lana finantzatuko dela.