Iruñeko Santa Maria katedralaren klaustroa zaharberritzen hasiko dira aurten, gaur goizean Kulturako, Turismoko eta Erakundeekiko Harremanetarako kontseilari Juan Luis Sánchez de Muniáinek iragarri duenez.

2015ean lehen fasea egitea aurreikusten da, Nafarroako Gobernuko Ondare Arkitektonikoaren Ataleko teknikariek idatzitako proiektuarekin bat etorriz. Proiektu horren arabera, klaustroan beharrezkoak diren lanak egitea proposatzen da ondorengo faseetan harri-fabrika zaharberritzen hasteko.

Zehazki. aurten proposatutako zereginak dira: klaustroko harri-lauzak konpondu eta finkatzea; erreten eta zorroten berriak jartzea; teilaren estalduraren zati bat altxatzea eta klaustrorako Barbazana kaperako kanalizazioko materiala kentzea; teila-estaldura berria jartzea eta berunezko adur-zapiak egikaritzea euri-urak bideratzeko; klaustrorako kaperako mendebaldea garbitzea eta kaperako eskailerako pinakulua zaharberritzea, klaustro aldera dagoena ere. Lan horiek Construcciones Zubillaga S.A enpresari esleitu zaizkio 156.494,09 euroan.

Gainera, Ondare Historikoko teknikariek harri-fabrikan esku hartzeko zenbait proiektu idatziko dituzte, jarraian eta urtero egingo diren faseetan, klaustroa erabat zaharberritu ahal izateko.

Esku-hartze guztia egiteko 4 milioi euro beharko direla kalkulatu du, hasieran; nolanahi ere, obra-proiektuak idaztetik ondorioztatzen dena errespetatuko da.

Segurtasun edo osasungarritasuneko arrazoiak eragozten dutenean salbu, obrak klaustrorako eta katedraleko lekuetara egindako gainerako bisitekin osagarriak izango dira.

Departamentuko teknikariek azaldu dutenez, 2013. urtetik (urte horretan klaustroa kaltetzen zuten patologia konplexu eta kezkagarriak hauteman ziren) premiazko zenbait esku-hartze eta azterketa asko egin dira (historiko-artistikoak, petrologikoak eta petrografikoak, eta bionarriadurakoak…).

Azterketa horien ondorioak Espainiako Kultur Ondarearen Institutuak 2014ko apirilaren 25ean egindako agiri batean jasota daude. Bertan, funtsean honako patologia hauek ikusten dira:

1. Harrizko materialari dagokionez, zatiak askatu izanaren ondoriozko hutsune eta galera bolumetrikoak daude, bai eta disgregazio eta hare bihurtzeko prozesuena ere; esfoliazioak daude, ezkaten bereizketa, plaken banantzea, higadura, zikinkeria, gordailuen pilaketa eta eraso biologikoa.Gainera, harriaren aldaketa kromatikoa ere agerian dago, bai eta elementu askoren deformazio eta hausturak ere, pinakuluak esaterako, tenkagailu eta sareekin behin-behinekoz lotuta daudenak.

2.- Polikromian, zikinkeria-zarakarra ikusten da, materiala altxatuta, anpuluak, urradurak, hutsuneak eta lurrunkortasuna.

3. Elementu metalikoetan, zikinak daude, herdoilduta, deformatuta, materia galduta eta bionarriatuta.

4. Azkenik, egurrezko elementuetan, hautsa eta zikinkeria dago, pitzadurak eta deformazioak, bai eta materia-galerak ere.

"Occidens. Descubre los orígenes" izeneko erakusketa ikus daiteke bertan, gainera. Bilduma horrek sari bat baino gehiago jaso du: Europako AADIP 2013 Saria, CORE77 2013 Diseinuaren Saria,FX2013 Barne Diseinuko Nazioarteko Saria eta 2014ko Europako Museoaren Saria, monumentu-multzoak duen aparteko balioa nahiz interesa areagotuz.