Araudiaren berrikuntzak

Goicoechea kontseilariak gogora ekarri duenez, errenta-aitorpena aurkeztera behartuta daude 2014an 11.250 euro gordin edo gehiagoko lan-errendimendua lortu zutenek; 1.600 euro baino gehiagoko atxikipenaren mende dauden kapital higigarri edo ondare-gehikuntzen errendimenduak; eta oro har profesional, enpresaburu eta kapital higiezinak jasotzen dituztenek.

PFEZaren aitorpenarekin batera, Ondarearena ere aurkeztu behar dute zerga-kuota positiboa dutenek edo, nolanahi ere, milioi bat euro baino gehiagoko ondasunak dituztenek, ohiko etxebizitzaren balioa salbu 250.000 euroraino.

Aitorpen horri aplikagarriak zaizkion araudiko berrikuntzei dagokienez, Ekonomia, Ogasun, Industria eta Enpleguko kontseilariak kapital higiezinen errendimendu garbietan aldaketak nabarmendu ditu; kenkari berria indarrean sartu izana biomasa erabiltzen duten instalazio termikoetan egindako inbertsioengatik; Gizarte Segurantzari egindako kotizazioengatiko murrizketa zabaltzea edozein senide-mota zaintzeko; eta indize zuzentzaile berria energia elektrikoa erabiltzen duten ureztatze-lurretarako . Berrikuntza horiek guztiak kanpainaren dokumentazioan zehaztuta daude.

2013ko Kanpainaren emaitzak

2013ko Errenta Kanpainak 467.847 zergaduni zegozkion 335.406 aitorpen jaso ziren; haietatik 223.608 negatiboak izan ziren (205,33 milioi itzuli ziren), eta 101.798 positiboak, 115.99 milioi eman zituztenak.

2013ko balantze horren arabera, Nafarroako zergadunen % 60,68k 18.000 euro baino gutxiagoko zerga-oinarria zuen eta zerga-bilketaren % 10,42 eman zuen; % 30,68k 18.000 eta 45.000 euro arteko oinarria aurkeztu zuen, zerga-bilketaren % 43,54 emanez; eta % 8,63k, 45.000 euro baino gehiagoko zerga-oinarriarekin, zerga-bilketaren % 45,76 eman zuen.

% 0,7ko esleipenari dagokionez, aitortzaileen % 47,11k (kuota osoaren % 49,58) helburu sozialetarako bideratzea erabaki zuen eta aitortzaileen % 31,93k (% 37,91 ematen dutenak), Eliza Katolikoari.