Nafarroako Gobernuak gaurko bilkuran behin betikoz onartu du "Aroztegia Jauregia" (Baztan) turismo-eremua PSIS (Udalaz Gaineko Eragina duen Plan Sektoriala) gisa onartzea, Lurralde Antolaketaren Batzordeak egindako aldeko txostena jaso ondoren,"Palacio de Arozteguía, S.L" enpresak sustatutako eta Lekaroz nahiz Elizondoko herriguneen artean kokatutako proiektua, 45 hektareako esparru batean garatzen da, eta bereizitako hiru eremu egitea proposatzen du: kirol, hotel eta etxebizitzetarako.

Hotel-eremua erdigunetzat jotzen da, eta golf-zelaiko partzela batean kokatzen da. 4 izarreko hotel-bainuetxe bat izango du, 135 gelekin, kalitate handiko jatetxearekin eta ekitaldiak egiteko espazioarekin.

Etxebizitzetarako eremua bereizitako hiru aldetan gartzen da ipar-mendebalde, ipar-ekialde eta hego-ekialdeko izkinetan: 228 etxebizitza, guztira, familia bakarrekoak, binakakoak eta etxebizitza kolektiboen blokeak.

PSISa ingurua zeharkatzen duten ubideak integratuz osatzen da, ibai-ibilgua antolaketako egituraren elementu modura integratuz (parkeak, natur ibilbideak eta kirolguneak), uren kalitatea murriztuko duten eraikuntza-elementurik gabe. Gainera, ibaiak eta sakanak gurutzatuko dituzten azpiegiturek behar besteko ahalmena izango dute funtzio hidraulikoa eta ingurumenekoa errespetatzeko.

Proiektuak inguruaren eta Lekaroz nahiz Elizondoko herriguneen arteko oinezko-txirrindularien lotura ziurtatuko du, bai eta Lekarozko Enpresa Canpusekoa ere; beraz, argi, seinale eta zolaketari lotutako jarduerak egingo dira.

Proiektuaren printzipio orientatzaileak honako hauek dira: diseinuaren kalitatea, ingurumenarekiko eta kultur ingurunearekiko errespetua, bai eta tokiko elkarrekintzak sustatzea ere. Sei jarduera-ardatz estrategikoen baitan prestatzen da: turismoa, natura, kirola, osasuna, aisialdia eta kultura. Turismo-arloari dagokionez, proiektuak Baztan eta Nafarroaren erakargarritasuna sustatu nahi du, jadanik badiren erakargarritasun guztien osagarri gerta dadin.