Nafarroako Gobernuak, NILSA enpresa publikoak kudeatzen duen Nafarroako Ibaiak Saneatzeko Plan Gidariaren bidez, 51,2 milioi euro inbertituko du 150 proiektu baino gehiagotan hondakin- eta euri-uren tratamendua hobetzeko datozen sei urteetan. Jarduera hori saneamenduko kanonarekin finantzatuko da.

Nafarroako Gobernuak ostegun honetako bilkuran jakin duenez, proiektu berriak lau jarduera-lerrotan sartzen dira: arazketa biologikoa 500 biztanle baino gutxiagoko udalerri guztietan; euri-urak eta ur fekalak kontrolatu eta kudeatzea ("ur nahasiak" izenekoak); 20-25 urte arteko egungo instalazioak berritu eta eguneratzea; eta 250 biztanle baino gutxiagoko guneetan premiazko jarduerak egitea. Berrikuspen horren barnean, ondorengo udalerrietako araztegietako instalazioak hobetuko dira: Corella, Olazti, Erriberri, Zangoza, Tafalla edo Ultzama.

2015-2021 plan gidariaren berrikuntzan sartutako udalerriak, eta hobekuntzak edota azpiegitura berriak izango dituztenak foru-lurralde guztian banatuta daude. Hala, jarduerak honako leku hauetan egitea aurreikusten da: Murillo, Lotza, Anotz, Lantz, Ledea, Puiu, Lizarraga, Torres del Río, Billabeta, Ziordia, Urdazubi, Meotz, Jaitz, Larrion, Monreal, Orbaitzeta, Cabredo, Arano, Torrano, Uxue, Arbeitza, Labio, Aguilar Kodeskoa, Almandoz, Esprontzeda, Desojo, Bera, Baztan, Altsasu, Untzue, Ezkurra, Tafalla, Erriberri, Olazti/Olazagutía, Gorozin, Zubielki, Labeaga, Lukin, Zubieta, Doneztebe/Santesteban, Aroztegi, Zangoza, Valtierra, Arguedas, Cintruenigo, Buñuel, Cortes, Corella, Arbontze, Urzainki, Hiriberri- Aezkoa, Armañantzas, Zugarramurdi, Etxarri-Aranatz, Izuriaga, Ollakarizketa.

Jarduketa horien finantzaketa, eta egungo instalazioen operazioa eta mantentze-lana –urtean 13 milioi euro gehigarriko batez bestekoan finkatutakoa–, saneamenduko kanonaren bidez ordainduko da; kanon hori Nafarroako zergadun guztiei igortzen zaie ur-ordainagiriaren bidez, eta NILSAk duela 25 urtetik kudeatzen du.

Plan gidariak duen birjartzeko eta konponketetarako funtsa ere aplikatuko da, baina hura ere urte bakoitzerako ematen den kanonaren diru-bilketako zati batekin hornitzen da. 2014an, funts horri saneamenduko kanaon guztiaren % 18,7 esleitu zitzaion, hau da, 27,5 milioi euro.

Ibaiak Saneatzeko Plan horren eguneratzea konfederazio hidrografikoek 2015-2021 aldirako aztertzen ari diren mugape-planek eragin dute neurri batean, eta baita planaren aurreko fasea amaitzeak ere, Gobernuak 1989an sortutakoa.