Entzierroko sorospen-puntuak ondorengo tokietan jarriko dira: Santo Domingoko aldaparen hasieran (Hezkuntza Departamentuaren egoitza), Nafarroako museoaren eskaileretan, Santiagoko plazan (udaletxeko atzealdea), San Saturninoko eskaileretan, udaletxean (2), Merkaderes kalean (2), Xabierko jaitsieran (2), Espoz eta Minako zeharbidean, Ahumadako Dukean, Labriteko jaitsieran, Nafarroako Gorteetan ("Telefonica" edo hegoaldeko kailejoia) eta Hemingway-en (iparraldeko kailejoian).

Gainera, medikalizatutako sorospen-puntu bakoitzak osasun-garraioa izango du; bizi-euskarri aurreratuko 9 anbulantzia izango dituzte, eta oinarrizko bizi-euskarriko 6; azken horietako 2 Gazteluko plazan egongo dira laguntza modura 112-SOS Navarra zentrotik bideratzeko osasun-garraio gehiagoren beharra dagoen ibilbideko puntura bidaltzeko.

Laguntza-dispositibo horretan arreta emateko izango dira, gutxienez: 12 mediku, 12 erizaintzako unibertsitate-diplomadun, 50 sorosle, komunikazioko 8 langile eta postuko 8 koordinatzaile. Ibilbideko arreta Gurutze Gorri, DYA, Suhiltzaile eta Nafarroako Osasun Zerbitzuko osasun-baliabide eta -langileek emango dute. Bertatik bertarako osasun-arreta emango dute, eta zaurituak anbulantzian eramango dituzte Nafarroako ospitalegunera egokituko zaien sektoretik; hala, denbora errealean SOS Navarrako 112 Koordinazio Zentroari informazioa emango die artatutako pertsonen zauri eta lesioen gainean.

SOS Navarrako 112 Koordinazio Zentroa arduratuko da osasun-laguntza antolatzeaz, eta zaurituak osasun-zentroetara bideratzeaz, zauritu larrienak izan daitezen lehenak Nafarroako Ospitalegunera lehenak iristen, edo 112-SOS Navarrak erabakitzen duen zentrora.

Uztailaren 6an, Txupinazioa dela-eta, lehen laguntzak emateko hiru postu izango dira Jakobako Pasadizoan, Santo Domingo aldapan (Hezkuntza Departamentuko egoitzaren alboan) eta San Cerninen. Gurutze Gorri, DYA eta Nafarroako Osasun Zerbitzuarekin lankidetzan jarritako postu horiek, honako osasun-beharrak artatuko dituzte: festen hasiera-ekitaldian batzen den jendetza handiaren ondorioz, bertaratutakoek hartutako kolpeak, kristalek eragindako ebakiak eta beste patologia txiki batzuk.

Dispositibo hori 1 medikuk, 3 erizaintzako unibertsitate-diplomadunek, 1 soroslek, bizi-euskarri aurreratuko anbulantzia batek, oinarrizko bizi-euskarriko beste 5ek eta laguntzeko 2 ibilgailuk osatuko dute.

Horren guztiaren osagarri, uztailaren 6 eta 7rako, eta 10, 11 eta 12ko astebururako, Lehen Arretako Unitate bat prestatuko da Vazquez de Mella ikastetxean (aurreko urteetan bezala), jaietako patologia arinak artatzeko.

Bertan, lehen arreta bat egingo da eta, hala badagokio, larritasun handiagoko pazienteak San Martin doktorearen anbulatoriora edo Nafarroako ospitalegunerako bideratuko dira. Puntu horretan arreta emango da uztailaren 6ko 10:00etatik eta hilaren 7ko 22:00ak arte, eta hilaren 10eko 21:00etatik (ostirala) hilaren 13ko (astelehena) 08:00ak arte; etenik gabeko arreta eskainiko dute medikuek, erizainek eta erizainen laguntzaileek, Nafarroako Osasun Zerbitzuaren laguntzarekin.

Osasun Departamentuak, azken hiru urteotan egin duen moduan, prentsa-areto bat prestatu du, eta bertan entzierroko zaurituei buruzko informazio guztia egunero igorriko du. Aurten, Nafarroako Ospitaleko lehengo larrialdi-zerbitzuetan kokatuko da, zaurituak eramaten diren larrialdietako eraikin berriaren alboan.

Kazetariek entzierroa prentsa-aretoan zuzenean ikusi ahalko dute, hala nahi izanez gero; telebista-pantaila bat jarri da bertan. Gainera, egunero informazioa bi unetan emango da; bata, 08:20-08:25ean, eta ordu horretan goiz horretako zaurituen lehen aurrerapena egingo da; 08:50ean, berriz,prentsaurrekoa emango da, eta egun horretako zaurituei buruzko informazio guztia ematen ahaleginduko dira. Egunero bertaratuko dira, Larrialdi Zerbitzuetako buru Javier Sesma edo Kudeaketari Laguntzeko Unitateko buru Wilfredo Soler.

Prentsa-aretoa leku aproposa izango da osasunaren arloan San Fermin jaietan gertatutako informazio oro igortzeko.