Nafarroako Lehendakari Uxue Barkosek 2015-2019 legealdirako izendatutako bederatzi kontseilariak beren karguez jabetu dira gaur eguerdian Nafarroako Jauregiko Tronuaren Aretoan egindako ekitaldian. 100 bat gonbidatu, agintari, eta bereziki senide nahiz adiskideak izan dira ekitaldi horretan.

Ekitaldia Tronpeta eta Tinbalen Bandak interpretatutako Nafarroako ereserkiarekin hasi da. Jarraian, eta Lehendakariak atzo sinatu eta gaur Nafarroako Aldizkari Ofizialean argitaratutako foru-dekretu bakoitza irakurri ondoren (haren bidez bederatzi departamentuetako titularrak izendatzen dira), bederatzi kontseilariek karguari zin egin diote Lehendakaria aurrean zutela. Hori egin ondoren, Lehendakariak Nafarroako armarria duen intsignia jarri die.

Nafarroako Gobernuko bederatzi kontseilariak honako hauek dira: Manu Ayerdi Olaizola (Garapen Ekonomikoa); Miguel Laparra Navarro (Eskubide Sozialak); Mikel Aranburu Urtasun (Ogasuna eta Finantza Politika); Maria José Beaumont Aristu (Lehendakaritza, Funtzio Publikoa, Barnea eta Justizia); Ana Ollo Hualde (Herritarrekiko eta Erakundeekiko Harremanak); José Luis Mendoza Peña (Hezkuntza); Fernando Domínguez Cunchillos (Osasuna); Ana Herrera Isasi (Kultura, Kirola eta Gazteria); Isabel Elizalde Arretxea (Landa Garapena, Toki Administrazioa eta Ingurumena).

Haiek guztiek karguari euskaraz eta gaztelaniaz zin egin diote, Miguel Laparra eta Fernando Domínguezek salbu (gaztelaniaz); Mikel Aranburuk, berriz, euskara hutsean egin du. Gainera, Manu Ayerdi, Miguel Laparra eta Ana Ollok, hurrenez hurren, lehen eta bigarren lehendakariorde eta gobernuko eledun modura beren karguei zin egin diete

Guztiak agurtu ondoren, Uxue Barkos Lehendakariak gabineteko kide guztiengana jo du "Gobernu berrian garai berri baterako" bere gain hartzen duten "erantzukizun handiagatik" eskerrak emateko.