Nafarroako Gobernuak 131.000 eurorekin finantzatuko du ikastetxe publiko nahiz pribatuek 2015-2016 ikasturtean garatutako kirol-programa. Diru-laguntza horren helburua ikasleengan ondorengo adinetan kirol-jarduera jarraitua dakarren ohitura fisikoa sortzea da.

Diruz lagundutako eskola-adineko kirol-programek hezkuntza eta aisialdiko osagaia nagusituko den jarduera fisikoak egitea sustatu beharko dute. Gizarteratzeko, osasuneko, ongizateko eta dibertsioko tresna izango dira ere ikasleen prestakuntzari eta hezkuntza integralari laguntzeko.

Diru-laguntzen deialdi honen oinarrien arabera, Nafarroako Aldizkari Ofizialean berriki argitaratutakoak, ikastetxeek laguntza horiek abuztuaren 30a baino lehen eskatu beharko dituzte. Horretarako, beharrezko dokumentazioa aurkeztu behar dute Nafarroako Kirol eta Gazteria Institutuaren egoitzan (Emilio Arrieta kalea, 25, Iruña), bai eta Foru Gobernuko gainerako erregistroetan edo 30/1992 Legean ezarritako tokietan ere.

Programa egin eta koordinatzea, bertako jarduerak eskola-ordutegitik kanpo egin beharko direnak, ikastetxeko Gorputz Hezkuntzako Departamentuari egokituko zaio. Jarduerak egiteko kiroletako abiarazlea edo begirale modura gutxieneko kalifikazioa duten langileak izan ahalko dira. Gainera, ikastetxeek kanpoko eragileen lankidetza eskatu ahalko dute, esaterako: federazioak edo kirol-klubak, toki-erakundeak edo kirol-kudeaketako enpresak.

Nafarroako Gobernuak 4.000 euro arteko diru-laguntza emango dio kirol-programa bakoitzari, dagoen aurrekontuaren arabera. Zehazki, kirol-material suntsikorra erosteari, langileen kontratazio edo prestakuntzari eta joan-etorriei lotutako gastuak finantzatuko dira.