Nafarroako Gobernuak gaur, ostiraleko bilkuran, Gobernuko kideek eta Administrazioko goi-karguek orain arte jasotzen zuten ordainsari osagarriari uko egitea onartu du; ordainsari hori sozietate publikoetako kontseiluetan izateagatik jasotzen zuten, konpentsazio modura.

Ordainsari osagarri hori 2012. urtetik eta legealdia amaitu arte, 39 goi-karguk jaso dute, 898.850,31 euro, guztira.

Zehazki, gaurko erabakiaren bidez, % 25eko soldata-igoerak kenduko dira Gobernuko Lehendakaritzan, % 20 Lehendakaritzaordetzetan, eta % 15 kontseilari, zuzendari nagusi, zuzendari-kudeatzaile edo kontseilarien gabineteko kideen kasuan.

Foru Gobernuaren kasuan, ordainsari osagarria abenduaren 28ko Nafarroako Aurrekontu Orokorren 19/2011 Foru Legean ezarri zen 2012rako, eta 2015era luzatu zen. Osagarria berehala ken dadin, aurrekontu-legea aldatzeko parlamentuko izapide baten zain egon gabe, Foru Gobernuak erabaki du Gobernuko kideek osagarria jasotzeari berariaz eta banaka uko egingo diotela. Eskubideen uko-egite hori Nafarroako Eskubide Zibilaren Bildumak nahiz Kode Zibilak legez babesten dute.

Gainera, Gobernuak Foru Gobernuak 2012ko urtarrilaren 25ean hartutako erabakia ondoriorik gabe uztea onartu du; erabaki horretan, goi-karguentzako osagarri hori ezartzen zen.

Neurria Nafarroako Gobernua osatzeko Programaren Akordioaren 23. puntua aplikatuz hartu da, Geroa Bai, EH-Bildu, Podemos eta IU-IE alderdi politikoek izenpetutakoa.