Landa Garapeneko, Toki Administrazioko eta Ingurumeneko kontseilari Isabel Elizaldek oso balorazio positiboa egin du eragileek gaur goizean eratutako esnegintzako lan-mahaian emandako erantzun eta partaidetzari buruz, esnegintzako egiturazko krisiari irtenbide bat emateko asmoz.

Industriako abeltzain, banatzaile eta ordezkariek nahiz Landa Garapeneko, Nekazaritzako eta Abeltzaintzako zuzendari nagusiak parte hartu dute bilkuran, eta Nafarroako Gobernuak deitu du elikagaien balio-katea osatzen duten eragileen arteko elkarrizketa sustatzeko nahiz errazteko –ekoizleak, industriala eta merkataritzako banaketa–.

Alde horretatik, Elizalde kontseilariak azpimarratu du ere, parte-hartzaileek marko horrenganako prestutasun handia erakutsi dutela; izan ere, era honetako prozesuek zailtasun handiak dituztela jakin arren, deitutako mahaian lan egiten jarraitzeko erabakia hartu dute.

Gainera, adierazi du Nafarroako esnegintzak bizi duen egungo krisia ikusirik, Foru Komunitateko 192 ustiapenen bideragarritasuna arriskuan dago. Arrazoi hori dela tarteko, eta Komunitateko Gaietarako Nekazaritzako Politikako Kontsulta Organoan parte hartu ondoren eta Batzordeak eta Ministroen Kontseiluak iragarritako neurriak zein diren jakin ondoren, lan-mahai hau deitzea egokitzat jo da Nafarroarako estrategikoa den sektore baten gainean: estrategikoa ez soilik ikuspegi ekonomiko batetik begiratuta, baita lurraldea antolatzeko elementu gisa begiratuta ere, ustiapen gehienak landaguneetan baitaude, mendialdean bereziki.

Erabaki dutenaren arabera, jarritako helburuetan oinarri duen lan-programa zehatza ezartzea geratzen da aurretik; beraz, mahaiaren hurrengo ohiko bilkura baino lehen, Departamentua banaka bilduko da azpisektore bakoitzeko ordezkariekin (ekoizleak; industria/prozesadoreak; eta banaketa) datorren astetik aurrera, eta bilera horietan Gobernuko beste Departamentu batzuei parte hartzeko gonbita luzatuko zaie.

Batzordeak eta Ministroen Kontseiluak proposatutako neurriei dagokienez, bertaratutakoak ados agertu dira neurriak ez direla nahikoak aitortzean; gainera, haietako zenbaitek kontrako efektuak eragin ditzakete esnearen prezioan; halaber, lanean jarraitzeko beharraz hitz egin dute aldeen artean akordioak bilatzeko sektoreari egonkortasuna emate aldera.

Kontseilariak bilkuran parte hartu dutenei helarazi die, irtenbidea ekoizpen, banaketa eta industriako sektoreko eragileen arteko adostasun eta akordioetan bilatu behar dela, prezioei dagokienez egoera egonkor bat bermatzeko helburua izango dutenak; hala, kate guztirako izango zen onuragarria, hau da, egiturazko arazo bati irtenbide integrala eman behar zaio.

Bilkuran honako hauek parte hartu dute: Fermín Irigarai eta Pablo Iribarrenek (EHNE); Iñaki Mendioroz eta Miren Belatek (UAGN); Juanma Garro eta Patricia Zigandak (Lacturale); Fernando Iturralde, Alejandro Eslava, Jaime Salcedo eta Santiago Ortegak (Kaiku Elikagai Korporazioa); Antonio Lópezek (Carrefour/ANGED); Anabel Zariquieguik (Eroski); Joaquín Aranak (Mercadona); haiekin batera, Abeltzaintza Zerbitzuko zuzendari Miguel Angel Martínez eta Animalia Ekoizpeneko atalburu Agustín Poblador-ek.