Kontuan hartu behar da sektore publikoak berriz erabil daitekeen era askotariko informazio zabala sortzen duela, informazio soziala, ekonomikoa, geografikoa edo estatistikakoa, esaterako. Informazio hori oso erakargarria da berriz erabiltzeko, osoa, fidagarria eta kalitatezkoa baita. Informazio publikoa berriz erabiliz eta banatuz administrazio publiko eta herritar nahiz enpresei onurak ekartzea lortu nahi da (administrazioek beren datuak argitaratzen dituzte, eta herritar nahiz enpresek beren behar batzuk asetzen).

Nafarroako Open Data 2011ko martxoan jarri zen abian ordura arte eskuragarri ez zeuden datu publikoak erakusgai jartzeko, partikularrek eta enpresek berriz erabiltzeko, banatzeko asmoz, eta beren beharrak merkataritza-xedeekin edo xede horiek gabe asetzeko tresnak nahiz zerbitzuak sortzeko. Etengabe garatzen eta eboluzionatzen ari den proiektu dinamikoa da informazio denbora errealean eskura ahal dadin.

Open Data honako zutabe hauetan oinarritzen da: gardentasuna, lankidetza, partaidetza eta aberastasun ekonomikoa sortzea datuak zabalduz, eta zabalkunde horrekin enpresek behar edo joera berriak detekta ditzakete, beren produktuak eta zerbitzuak definitzeko oinarrizkoak direnak.

Izan ere, berriki Microsoft enpresa Nafarroako Gobernuarekin harremanetan jarri da autobusen hiriarteko garraio publikoari buruzko artxiboen gainean interesa agertuz.

Datuen irekierak Nafarroako gizarteari onura ekonomiko nahiz ezagutzazkoak ematen dizkio zuzenean. Enpresa eta sistema ekonomikorako oro har ahal ekonomikoa du eta aberastasuna sortzeko aukera; izan ere, informazioa erabil dezakete herritarrei eta beste enpresa batzuei eskaintzeko tresna nahiz zerbitzu digital berritzaile berriak sortzeko oinarri gisa. Beraz, hazkundeari bultzada eman diezaioke, eta baita enpleguaren sorrerari ere. Bestalde, enpresen arteko lankidetzak kostuak murriztea ekar dezake, eta hori aktiboen finkatzean eta interoperatibitatean gauzatzen da.