Nafarroako Lehendakari Uxue Barkosek Nafarroako Unibertsitate Publikoko Gizarte Kontseiluko presidente Roman Felones hartu du bere bulegoan, eta azken horrek 2014. urteari dagokion hezkuntzako erakundearen memoria entregatu dio.

NUPen Gizarte Kontseilua 1995eko maiatzean sortu zen, eta unibertsitateko gizartearen partaidetzako organoa da. Unibertsitatearen eta gizartearen arteko harremanetarako elementu modura jokatzen du, eta egiteko garrantzitsuak ditu hainbat arlotan: unibertsitateko plangintza eta garapen instituzionala, kudeaketa ekonomikoa eta goi-mailako hezkuntzako zerbitzuaren errendimendua ikuskatzea; gizartearen lankidetza sustatzea unibertsitatearen finantzaketan, eta prestakuntza nahiz ikerketako jarduera gizarte-beharrei egokitzea. 2008an, Gizarte Kontseiluak Nafarroako Parlamentuan onartutako lege berri bat izan zuen eta, haren bidez, aurreko eduki batzuk hobetu zituen.

Memoriaren sarreran, Roman Felonesek ondorengo puntuak nabarmentzen ditu iaz egindako jarduera aipagarrienei lotuta: "Osoko Bilkurak hurrengo urteetako lan-ildoak onartzea, gizartearekiko harreman-arloei buruzkoak nabarmen haziz; jarduerak nabarmen haztea batzordeek egindako lan eraginkorrean oinarrituz; Kontseiluaren lana bertan kideak jartzen dituzten erakunde, gizartearen –enpresak, bereziki– eta unibertsitateko komunitatearen beraren aurrean ezagutzera emateko ahalegina; Kontseiluaren jardueren berri emango duen etengabe eguneratutako webgune bat abian jartzea; harreman etengabea irakaskuntzako arduradunekin, irakasleekin, ikertzaileekin eta administrazio nahiz zerbitzuetako langileekin; eta lankidetza indartzea Gizarte Kontseiluen G9arekin; azken horren presidentea neroni izango naiz datozen bi urteotan nire kideek hala izendatuta".