Eskubide Sozialetako Lehendakariordetzak parte hartzeko metodologia bat abian jarri du gizarteratzeko egungo errenta berrikusteko; zeregin horretarako, bi talde tekniko independente eratu dira, eta haiek, alde batetik, prestazio hori behar duten pertsonen egoera aztertuko dute, eta bestetik, indarrean dagoen araudian sartu beharreko hobetzeko alderdiak edo, beharrezkoa balitz, erregulazio berri batean.

Gogora ekarri behar da, egungo legealdirako Programa Akordioan jasotako konpromisoen artean, honako hau bermatzea dagoela: legealdiko lehen sei hilabeteetan, pertsona guztiek gutxieneko diru-sarrera bat jasotzea oinarrizko errenta bat ezarriz. Konpromiso horrek, Eskubide Sozialetako Lehendakariordetzaren arabera, gizarteratzeko egungo errenta berrikustea esan nahi du, bai eta erabilitako kudeaketa-prozedurak berrikustea ere.

Aurreikusitako bi lan-taldeetatik, lehenengoa ostiral honetan bilduko da, estreinakoz. Oinarrizko gizarte-zerbitzuetako zortzi profesionalek (entitate horiek banatzen diren zazpi arloetako koordinatzaileek proposatuta) eta Eskubide Sozialetako Lehendakariordetzako beste hiruk osatzen dute. Indarrean dagoen araudia berrikusteaz gain, talde horrek hobetzeko proposamenak egingo ditu kudeaketako prozesu nahiz prozeduretan.

Bigarren taldea astelehenean hasiko da lanean, eta gizarte-erakundeetako zazpi pertsonek (bost pobreziaren eta gizarte-bazterkeriaren aurkako sareak proposatuta, eta hiru Caritasek, Gurutze Gorriak eta Oinarrizko Errentaren Plataformak proposatuta) nahiz Eskubide Sozialetako Lehendakariordetzako hiru profesionalek osatzen dute.

Bi taldeen lana azaroaren erdialderako amaituko da, araudia aldatzeko proposamenei dagokienez. Nolanahi ere, haien lanak epe horretatik aurrera jarraituko du, araudiaren aldaketei jarraipena egin eta ebaluatzeko; horrenbestez, legealdiaren amaieran, beharrezko aldaketak egin ahalko dira haien funtzionamenduari buruzko ebaluazio zehatza egin ondoren.