Elurra kentzeko 127 makina (haietatik 6 turbofresak) eta zaintza nahiz kontroleko 90 bat ibilgailuk osatzen dute Nafarroako neguko bidezaintzaren parke mugikorra, eta apirilaren 30 arte luzatuko da; asteburu honetan aktibatuko da estreinakoz, ostiralean ezartzen diren irizpideen arabera, aurreikusi diren lehen elurteak direla-eta.

Herri Lan Zuzendaritza Nagusiaren mende dauden 375 langileri eta autobia nahiz autobideen (AP-15, A-21 eta A-12) enpresa emakidadunei (teknikariak, langileak eta gidariak aintzat hartuta), Foruzaingo eta Guardia Zibileko agenteak gehituko zaizkie; Garapen Ekonomikorako Departamentuko Errepideak Kontrolatzeko Zentroarekin eta SOS Navarrarekin koordinatuko dira bideen 3.828 kilometrotan eta 39 mendateetan aurkitu daitekeen izotz nahiz elurrari aurre egiteko.

Horretarako, honako hauen laguntza izango dute: Sarean jarritako 303 kamera, 31 meteorologia-estazio, trafikoko datuak hartzeko beste 41 puntu eta 85 informazio-taula inguru (kanpoan eta tuneletan). Baliabide horiei Nafarroako Gobernuak toki-erakundeei emandako bide-garbiketarako 111 falka gehitzen zaizkie, bai eta 18.000 tona baino gehiagoko gatz-erreserba ere.

Giza baliabide ete baliabide material guztiek 2015/2016ko Neguko Bidezaintza Plana osatzen dute, aurreko urtetakoen antzekoa, baina berezitasun batekin: urtarrilaren 1ean Iruña, Agoitz, Tafalla, Tutera eta Lizarra inguruko zerbitzuko kontratu berriak indarrean sartzen direla; horrek esan nahi du Tuteran elurra kentzeko 2 makina kenduko dituztela, zerbitzua gaindimentsionatuta baitzegoen, eta baita Pirinioetako autobian erabiltzen ziren beste 2 ere, autobiaren emakidaduna bide guztiaren mantentze-lanaz arduratzen baita.

Neguko Bidezaintza Planak Nafarroako baliabideen esku hartzeko nahiz koordinatzeko mekanismoak eta prozedurak arautzen ditu, bai eta alboko autonomia erkidegoekiko eta toki-erakundeekiko komunikazio-protokoloak ere –Pirinio Atlantikoetako Kontseilu orokorrarekin ere–, tenperatura baxuei lotutako ondorioak prebenitu, ekidin edo murriztu aldera (elurra, izotza, kazkabarra, euria, lainoa, haizea…), ibilgailuen joan-etorria nabarmen zailtzen dutenak.

Bere garrantzi estrategikoaren arabera, errepide-sareak intzidentzien aurrean bereizitako bi zerbitzu-maila ditu neguko bidezaintzako baliabide nahiz arretari dagokionez. 35 bidetan zerbitzua etengabekoa da (eguneko 24 ordu). Autobide eta autobia guztiak dira, bitan banatutako bideak (Iruñeko Ingurabidea eta hiribururako sarbideak), N-121 A (Iruña-Behobia); lurraldea antolatzen duten interes orokorreko 9 errepide; eta komunikaziorako 14 bide interesgarri. Gainerako errepideetan (2. maila), zerbitzua 06:00etatik 21:00etara aktibatzen da. Nolanahi ere, Kontserbazio Zerbitzuak elurra kentzeko makinak lekuz mugitu ditzake meteorologia-egoera bakoitzean.

Elurra kentzeko 127 makinetatik, haietako 6 turbofresak dira, 95 Errepideen Kontserbazioaren mende daude, bai eta Nafarroako gainerako autobideak eta Bideko nahiz Pirinioetako autobiak ere. Gogora ekarri behar da ere, Belaguako mendateak 07:00etatik 19:00era funtzionatzen duen dispositibo egonkor bat duela (elurra kentzeko bi makina eta bi turbofresa) neguko kanpainaren egun guztietan. Zonaldean elur-jausien arriskuak jarraitzeko kontratatutako laguntza teknikoa ere badago.