Siria, Jordania, Ukraina eta Hondurasko 16 errefuxiaturi harrera egin zaie Nafarroan duela hiru astetik, Nafarroako Gobernuak eta Gurutze Gorriak talde horri arreta emateko antolatutako dispositiboaren barnean.

Bost familia-talde dira, eta haietako bik adin txikikoak dituzte beren kargu. Zehazki, familia bat jatorri jordaniarrekoa da (senar-emaztea eta lau adin txikiko), beste bat ukrainarra (senar-emaztea eta adingabeko bi); beste hiru bikote, berriz, siriarra, hondurastarra eta ukrainarra dira eta seme-alabarik ez dute.

Aste honetan familiek Nafarroako Lehendakari Uxue Barkosen eta Eskubide Sozialetako lehendakariorde Miguel Laparraren bisita jaso dute; azken horrek, hain zuzen, Foru Gobernuko gainerako kideei orain arte emandako pausoen berri eman die gaur goizean, bai eta alor horretan aurreikusitako jarduera-planen berri ere.

Familiak mailakatuta bidaiatu dute azaroko azken astean eta abenduko lehen hamabostaldian. Urriaren 15erako iritsiko zirela aurreikusten zen, baina Nafarroako Gobernuari ez dagozkion arrazoiengatik atzeratu egin dira. Lau talde Ceuta eta Melillako CETItik etorri dira (Immigranteen Aldi Baterako Egonaldi Zentroa) eta laugarren bat, Bartzelonako Gurutze Gorriko egoitzatik. Haietako bat bera ere ez dago udatik aurrera Europako Ekialdeko mugetatik iristen ari diren errefuxiatuen artean.

Gobernuko bilkuraren ondoren Ollo kontseilariak prentsaurrekoan adierazi duenez, Nafarroak bere borondatea erakutsi du pertsona horiek birkokatzeko erantzukizunean parte hartzeko, nahiz eta alor horretan eskumenik ez izan. "Asiloa eta babesa gizarte demokratikoen oinarrizko konpromiso bat da oinarrizko giza eskubideen babesean", aipatu du lehendakariordeak. Europar Batasunaren eta Estatuaren erantzuna gatazkaren larritasunaren pare ez dagoela uste du eta, beraz, Europa eta Estatuko erakundeei eskatu die "arazo honi berehalako erantzun bat eman diezaiotela, eta Europara heltzen saiatzen ari diren milaka pertsona bizitzen ari diren dramari modu erreal batean aurre egin diezaiotela".

"Gogora ekarri behar da jazarpen eta gerratik ihesi doazen pertsonak direla, eta mugetako fluxua kontrolatzeko neurriak ezin direla beharrezkotzat jo; pertsona horien asilo-eskubideari ezin zaio uko egin, nazioarteko legerian jasota dagoena", gogorarazi du lehendakariordeak.

"Gogoratuko denez, Foru Gobernuak iragan irailean pertsona horiek hartzeko eskaintza egin zuen eta, horretarako, 300 errefuxiaturi arreta emateko asilo-dispositibo bat prestatu zuen, eta konpromiso horrek indarrean jarraitzen du. Nafarroako Gobernuak herritarren partaidetza zentralizatzen du, eta maila askotako 393 eskaintza jaso dira, gehienak ostatua eskaintzen: partikularrak (120) edo toki-erakundeak (22). Boluntariotza (75) eta itzulpenak egiteko (43) eskaintzak ere jaso dira.