Larreak, sastrakak, inausketa-hondakinak eta basoko beste lan batzuk kontrolatuta erretzen utziko da berriz ere Nafarroako Kantauri isurialdean; izan ere, meteorologia-baldintzak hobetzeari esker, sute-arriskua murriztu egin da, eta azken 15 egunotan gune horretan 50 litroko prezipitazioa batu da batez beste metro koadroko.

Hala ondorioztatzen da Mendi Zerbitzuko zuzendariak emandako ebazpenetik, eta gaur, astelehena, urtarrilak 18, argitaratu dena Nafarroako Aldizkari Ofizialean; haren arabera, Foru Komunitateko iparraldeko 22 udalerritako hiri-lurzoruetatik kanpo erretzeko debekua ondoriorik gabe uzten da, iragan abenduan jarritako debekua, hain zuzen ere.

Kaltetutako udalerriak honako hauek dira: Arano, Arantza, Areso, Baztan, Beintza-Labaien, Bera, Bertizarana, Donamaria, Eratsun, Etxalar, Ezkurra, Goizueta, Igantzi, Ituren, Leitza, Lesaka, Saldias, Doneztebe, Sunbilla, Urrotz, Luzaide eta Zubieta, bai eta Erro ibarreko iparraldea eta lurralde horietan dauden partzuergoak ere.

Gogora ekarri behar da landagunean sua erabiltzea galarazita dagoela, oro har. Nolanahi ere, Nafarroako Gobernuak haren erabilera baimentzen du nekazaritza nahiz abeltzaintzako zenbait jarduera zehatzetarako, larreak hobetzeko eta basoetako hondakinak kentzeko, adibidez.