Errege Dekretua lehenago izapidetzeko gaur eskatzen den errekurtsoan alega daitezkeen eskumeneko eta lege-mailako gaiekin batera, pedagogia-mailako hainbat arrazoi daude Nafarroak (beste hainbat eskualde bezala) Gobernu Zentralak hartutako erabaki horren aurka egin dezan.

Nafarroako Gobernuaren aburuz, azterketa hori, hezkuntzako era honetako jardueretan ezinbestekoa den adostasuna ez izateaz gain, "ez da ebaluazio bat, ebaluazio batek izan beharreko izaera jarraitua, orokorra, prestakuntzakoa eta orientatzailea ez baititu; gainera ikasleen bilakaeraren une zehatz batera eta testuingurutik kanpoko egoera batera murrizten du".

Halaber, azterketa Lehen Hezkuntzan garatutako zazpi konpetentziatatik biri buruz soilik izango da; beraz, Foru Gobernuaren ustez, " ikasleei buruzko informazio aipagarririk ez du emango, hezkuntzako etapa horretan ikasleekin harremanetan izan diren irakasleen txostenetan azaltzen denarekin guztiz bestelakoa dena".

Azterketa horren aurka izateko beste arrazoietako bat ondorengoa da: irakasleek ebaluatzeko duten profesionaltasuna eta objektibotasuna zalantzan jartzen dela, bai eta ikastetxeetako zuzendaritza-taldeena edo ikuskaritzarena ere, azterketa horiei baliozkotasuna emateko kanpoko profesionalenagana jo behar izan delako. Nafarroako Gobernua kezkati agertu da "errebalida" horrek ikastetxeetan ranking-ak ezartzeko balio dezakeelako, eta horrek "ikastetxeak diskriminatzen eta ospea kentzen lagunduko luke, eta hezkuntzako lanari ez lioke mesederik egingo".