Bide Segurtasunaren Nafarroako Estrategiak lantalde baten sorrera sustatu du Foru Komunitateko kale nahiz errepideetan txirrindularien zirkulazio eta segurtasuna hobetzeko.Hura eratzeko bileran, Barneko zuzendari nagusi Agustin Gastaminza buru zela, hiru lan-ildo finkatu dira: udal araudiak homogeneizatzea, trebakuntza eta heziketa eta azpiegiturak. Gainera, bere jardueretan bi errealitate bereiziko ditu: hiri barneko eta hiri arteko inguruneak (araudia ezberdina da, adibidez).

Talde horretan honako erakunde hauetako ordezkariek parte hartzen dute: Foru Gobernua, Nafarroako Txirrindularitza Federazioa, DGTren Probintziako Buruzagitza, Nafarroako Udalerri eta Kontzejuen Federazioa, Foruzaingoa, Guardia Zibila eta Iruña, Barañain eta Tafallako udaltzaingoak. Bileran izandako pertsonak bat etorri dira lantalde hori sortzeko beharra dagoela esatean eta, laster, sortuko diren lantaldeetan beste erakunde batzuk sartzeko proposamena egingo dute.

Gogora ekarri behar da iragan urrian Barneko zuzendari nagusi Agustin Gastaminzak Nafarroako Jauregian "Bizikleta Zuria" izeneko bigarren martxan parte hartutako ehun bat ziklista hartu zituela; errepidean hildako beren kideak gogoratzeaz gain, kolektibo horren bide-segurtasuna hobetzea aldarrikatzen zuten.

Istripu-tasa eta seinaleztapena

Trafikoko Zuzendaritza Nagusiko Arena erregistroan jasotako datuen arabera, 2010.urtetik Nafarroan 169 trafiko-ezbehar izan dira bizikletekin, eta istripu horien ondorioz, 12 txirrindulari hil dira, 38 zauritu larri eta 124 arin.2014an hil ziren txirrindulari gehien: 5 heriotza. 2010ean, bi; 2011n, hiru; 2012an, bakarra; 2013an, beste bat; iaz, berriz, bat bera ere ez.

Bestalde, Foru Gobernuko Trafiko eta Bide Segurtasuneko Atalak egindako txosten batetik ondorioztatzen denez, Nafarroako bederatzi errepidetan seinaleak jarrita daude txirrindularien ibilia adierazteko.Haietako zenbaitetan abiadura murriztuta dago bideko gainerako erabiltzaileentzat edo gehieneko abiadura jakin bat gomendatzen da, eta beste batean galtzada-zati bat gordetzen da bertatik txirrindulariak joan daitezen.

Seinaleak jarrita dituen errepideak honako hauek dira: N-135 (Iruña-Frantzia, Luzaidetik), NA-128 (Azkoien-Zarrakaztelu-Zaragozarekin muga eginez), NA-411 (Ostiz-A15arekin lotura eginez), NA-1300 (Irurtzun-Gipuzkoarekin muga eginez), NA-1310 (Bera-Frantzia, Ibardinetik), NA-2310 (Aranguren ibarra), NA-3010 (Tutera-Ablitas), NA-4000 (Lesaka-Oiartzun) eta NA-4020 (Arantza).