Nafarroako Gobernuak gaur, asteartea, otsailak 9, iaz erretiratutako edo hildako Foru Administrazioko 594 enplegatu publikoak omendu ditu.

Baluarte jauregian egindako ekitaldian, Nafarroako Lehendakari Uxue Barkosek Foru Komunitateko armarria duen intsignia bat entregatu die, eta baita diploma bat ere, beren lanean buru-belarri aritzeagatik eta jardunean erakutsitako profesionaltasuna aitortzeko. Omenaldian parte hartu dute ere, Lehendakaritzako, Funtzio Publikoko, Barneko eta Justiziako kontseilari Mª Jose Beaumontek eta Funtzio Publikoko zuzendari nagusi Amaia Goñik.

Bere agerraldian, Barkos Lehendakariak omendutako Gobernuko langileei eskerrak eman dizkie Nafarroaren aurrerabidean eta ongizatean emandako laguntzagatik, bai eta Foru Komunitateko herritarrekiko hartutako konpromiso pertsonalagatik. "Eskerrak eman nahi dizkizuet Nafarroako erakundeen euskarri, oinarri sendo eta erreala izateagatik", gaineratu du Uxue Barkosek.

Ekitaldia Nafarroako Ereserkiarekin hasi da, José Luis Gómez (saxofoia), Javier Olabarrieta (pianoa) eta Jokin Zabalza (kontrabaxua) hirukoak interpretatu dute eta, horrez gain, jazz-piezak eta melodia herrikoi tradizionalak ere jo dituzte. Omenaldia erretiratutako funtzionarioa den Lontxo Aburuzak botatako hiru bertsorekin amaitu da; gizon hori bertsolaritza Nafarroan euskarazko ahozko literatura modura sustatzen lagundu duenetako bat da.

Omendutako 594 enplegatuetatik, 577 2015ean erretiratu ziren eta 17 hil egin ziren. Erretiratukoen artetik, 233k Osasunean egiten zuten lan, 207k Hezkuntzan, 127 Administrazio Nukleoan eta 10 Justizian.

Nafarroako Gobernuko erretiratutako edo hildako langileei egindako omenaldi hau 1985. urtetik egiten da. Iaz 510 enplegatu omendu ziren, eta aurrekoan, 527.