Nafarroako Gobernuak "Bultzada Ekintzailea" programaren laugarren edizioa abian jarri du; haren bidez, enpresako bederatzi proiekturi –aurreko edizioetan baino bat gehiago– laguntza tekniko eta finantzarioko berariazko programa bat emango zaie konpainia aholkularien eskutik, negozio-ideien garapena bizkortzeko eta enpresaren sorrera errazteko asmoz.

Edizio berri honetan Caja Rural de Navarra, Cinfa, Mondragon Korporazioa, Correos, Jofemar, MTorres, Mutua Navarra, Uscal eta Viscofan dira babesleak, eta aurreko edizioetako enpresa laguntzaileei aurten Uscal gehitu zaie. Konpainia horietako bakoitzak proiektu bat bultzatuko du 8.000 eurorekin eta aholkularitzako ekintzekin.

Programa honen laugarren edizioa gaur goizean aurkeztu du Nafarroako Gobernuko Garapen Ekonomikorako lehendakariorde Manuel Ayerdik, enpresa babesleen ordezkariek ere parte hartu duten ekitaldian (lankidetza-hitzarmenak sinatu diren enpresetako ordezkariak); Sodenako zuzendari nagusi eta Nafarroako Enpresa eta Berrikuntzako Europako Zentroa (CEIN) sozietate publikoko kontseilari delegatu Pilar Irigoien ere bertan izan da.

Lehendakariordeak enpresei eskerrak eman dizkie ekintzailetza sustatzeko (ekonomikoaren motorretako bat) lankidetza publiko-pribatu honetan parte hartzeagatik

"Gure konpromisoaren adibide garbi bat da, ez soilik programarekiko, baita Nafarroako ekintzailetza bultzatzeko nahiz gure Foru Komunitate garatzeko ere", aipatu du; jarraian enpresari aholkulariek Bultzada Ekintzaileari ematen dioten balioa azpimarratu du. "Programa honek finantza-laguntza bat baino askoz gehiago eskaintzen du, zuen esperientzia".

"Bultzada Ekintzailea" programak hautatutako bederatzi proiektu berriei, lau hilabetez, Nafarroako Enpresa eta Berrikuntzarako Europako Zentroa sozietate publikoak (CEIN) prestatutako enpresen sorrera bizkortzeko berariazko programa bat eskainiko die; haren bidez, negozio-ideia bat garatu eta egiaztatzea lortuko dute eta enpresa-jarduera bat hasteko prestatzea. Proiektu bakoitzak, gainera, bere enpresa-babeslearen laguntza jasoko du, eta azken horrek bere esperientzia, ezagutza eta zuzkidura ekonomikoa emango dio.

Proiektu parte-hartzaileek banakako tutoretzak jasoko dituzte, eta CEINeko Berrikuntza Haztegian instalatu ahalko dira 6 hilabetez doan, eta Sodenaren finantzaketa jasotzeko lehentasuna izango dute.

Hautagaitzak, martxoaren 18ra arte

Programa jatorria edozein izanda ere ekintzaileak diren pertsonentzat da, berrikuntza-proiektu bat dutenak, hazteko ahal dutenak eta Nafarroan errealitate bihurtu nahi dutenak.

Proiektuak honako esparru hauen barnean sartu ahalko dira: nekazaritza-elikadura, automobilgintza, biosanitarioa, IKT, industria, logistika, energia berriztagarriak, ingurumena, mekatronika, turismoa, merkataritza eta zerbitzuak.

Parte hartzeko interesa duten pertsona ekintzaileek honako webgune honetan eskura daitekeen formularioa bete behar dute: http://www.cein.es. Hautagaitzak aurkezteko epea martxoaren 18ana amaituko da.

Eskaera guztiak jasotzen direnean, CEINen ebaluazio-batzorde batek lehen aurrehautaketa bat egingo du 20 proiekturekin gehienez. Aurrehautaketa hori ondorengo irizpideetan oinarrituko da, esaterako: talde ekintzailea, negozio-ereduaren azterketa, hazteko ahala, berrikuntza eta betetako helburuak.

Proiektu parte-hartzaileen azken hautaketa apirilaren 19rako iragarrita dago; une horretan, hautatutako proiektuak bederatzi enpresa babesleek baloratuko dituzte, eta haietako bakoitzak lagunduko duen proiektua hautatu eta programan sartuko da.

Guztira, 473 proiektu aurkeztu ziren "Bultzada Ekintzailea" programaren aurreko hiru edizioetan, eta 22 proiektuk parte hartu dute. Orain arte 17 enpresa sortu dira, 2.754.000 euroko inbertsioa egin da eta 47 lanpostu sortu.