Nafarroako Zerga Ogasunak eta Arabako Foru Aldundiak hitzarmen bat sinatu dute Gasteizen eta, haren bitartez, zerga-informazioa trukatu ahalko da, alde batetik, iruzur fiskalaren aurka borrokatzeko, eta bestetik, zerga bidezko diru-bilketa hobetzeko: BEZa eta Ekonomia Jardueren gaineko Zerga, esaterako.

Hitzarmena Nafarroako Ogasuneko zuzendari-kudeatzaile Luis Esanek eta Ogasun nahiz Finantzetako diputatu arabar Jose Luis Cimianok izenpetu dute.

Hitzarmenari esker, Nafarroak eta Arabak informazio fiskala trukatzeko "sistema egonkor eta elkarrekiko" bat partekatu ahalko dute.

Zehazki, langile teknikoek beste erakundearen datu-basera jo ahalko dute kudeaketa hobetzeko eta pertsona fisikoek, autonomoek eta enpresek zergak ordaindu dituztela egiaztatzeko. Gainera, akordio horrekin, bi lurraldeen arteko eragiketa jakin batzuk egitera behartutako pertsona zergadunen kudeaketak erraztuko dira.

Nafarroako Zerga Ogasuneko zuzendari-kudeatzailea gustura agertu da hitzarmen hau izenpetu izanagatik; haren arabera, adierazi du, "bi lurraldeek informazioa trukatu ahalko dute zergadunen arreta hobetzeko eta iruzurraren aurka eraginkorragoak izateko, gizarte modernoetan helburu nagusi bat dena". Esainek azpimarratu duenez, gainera, izenpetze horrekin hiru euskal aldundiekin lortutako akordioak osatzen dira; hala, 2014. urtetik Bizkaikoarekin eta Gipuzkoarekin zegoen elkarlana zabaltzen da.