Ostegun honetan, hilak 7, hasiko da Nafarroan pertsona fisikoen errentaren gaineko zerga eta ondarearen zerga ordaintzeko 2015eko kanpaina. Ekainaren 24ra arte aktibo izango da eta, edizio honetan, bi data adierazgarri daude: osteguna, hilak 7, Internet bidez aitorpenak aurkezteko hasiera-eguna, eta asteazkena, hilak 20, Ogasuneko bulegoetan edo erakunde laguntzaileetan aurkezteko hasiera-eguna.

Zehazki, ostegunean, apirilak 7, Ogasunak Interneten (www.navarra.es helbidean), 239.885 zergadunen 179.058 aitorpen-proposamen argitaratuko ditu. Ogasunak osatu dituen jakiteko, NAN zenbakia sartu beharko da soilik. Edukia eskuratu nahi izanez gero, PINaren zenbakia behar da ere (aurreko urteko aitorpenari erantsitako pasahitza). Proposamen horiek dagozkien etxeetara paperean igorriko dira hilaren 15erako.

Aurkezpen fisikoa apirilaren 20tik ekainaren 24ra egingo da, bi bide erabiliz: 18 erakunde laguntzailek osatutako sarea (arreta emateko 1.300 puntu) eta Ogasunaren sei bulegoak.

Komunikazio-kanpaina

"Gure konpromisoarekin, piezak bat etortzen dira" da aurtengo komunikazio-kanpainaren goiburua eta, haren bidez, ondorengoa ikusarazi nahi da: herritarrek gastu publikoei eusteko egindako ahaleginak guztiontzako onura dakarrela, Mikel Aranburu kontseilariak prentsaurrekoan azpimarratu duenez. Horretarako, osasun eta hezkuntzako bi irudi hautatu dira, Nafarroako Ospitalegunea eta Unibertsitate Publikoa, ongizate-sistemaren zutabeak direnak.

Data adierazgarriak zabaltzeko eta kontribuzioaren garrantzia azpimarratzeko, Nafarroako Gobernuak 65.000 euro inbertituko du eguneroko prentsan (Diario de Navarra, Diario de Noticias, Gara y Berria), tokikoetan (dozena bat aldizkari) eta Nafarroako irrati-etxeetan (SER, Cope, Onda Cero, Euskalerria Irratia eta Xorroxin).

Ogasunak emandako aitorpen-proposamenak urtero aurkeztutako aitorpenen % 50 inguru dira.

Aitorpen-proposamenak jasotako pertsonek, ados ez badaude, beste aitorpen bat egin beharko dute bulego birtualaren bidez edo fisikoki (erakunde laguntzaileen sarea edo Ogasunaren bulegoak). Ados badaude, ez da urratsik egingo.

Itzultzeko proposamena bada, Ogasunak zenbatekoa apirilaren 18tik aurrera sartuko du. 120.700 proposamen inguru sartzen dira kategoria horretan, eta 71,9 milioi euro itzuliko dela aurreikusten da.

"Ordaintzea" egokitzen bada, Ogasunak zenbatekoa bi ordainketetan helbideratuko du (% 50 bakoitza), uztailaren 1ean, ostirala, eta azaroaren 21ean, astelehena. 50.000 bat proposamen daude egoera horretan (36,6 milioi euro). Beste 9.600 bat aitorpenek zero kuota dute.

Aitorpena nork aurkeztu behar duen

PFEZ aitorpena egiteko betebeharra dute 11.250 euro gordin edo gehiagoko lan-errendimenduak dituztenek; kapital higigarriko errendimenduak eta ondarearen gehikuntzak dituztenek, 1.600 euro gordin edo gehiagoko atxikipenen mende daudenak; eta beste errenta batzuk jasotzen dutenek (enpresaburuak eta profesionalak, errentatzaileak), haren zenbatekoa alde batera utzita.

Iazko kanpainan, Ogasunak 325.395 PFEZ aitorpen kudeatu zituen, 472.547 aitortzaileri eragiten ziena. Zerga horren bidez 1.519,21 milioi euroko kuota osoa jaso zuen, eta 1.326,6 euroko kuota likidoa (itzulpen gutxiagoren diru-sarrerak).

Aitortzaileen % 50,1 gizonezkoak ziren eta Ogasunak jasotzen duen kuota osoaren % 65 eman zuten. Emakumeak % 49,9 ziren, baina haietatik sortzen da kontribuzioaren gainerako % 34,7, eta horrek agerian uzten du errenta-maila txikiagoetan daudela.

Bestalde, Ogasunaren zerga-bilketa mamitsuena 18.000 eta 45.000 euro arteko oinarri "ertainetatik" dator: aitortzaileen % 25 eta jasotzen duen kuotaren % 51,2. Diru-sarrera handiagoko aitortzaileen pertsonetatik (% 4) dator kuotaren % 25 bat.

Horrez gain, beren ondarea aitortu behar dute zerga-kuota positiboa duten subjektu pasiboek, edo beren ondasun nahiz eskubideen balioa 1 milioi euro baino handiagoa bada. Ohiko etxebizitza salbuesten da 250.000 euroraino (titulartasun partekatuko ezkontide bakoitzeko), eta hura eskuratzeko dagoen zorra ez da kenduko.