Osasun Departamentuak guztira 210.000 euro erabiliko du 2016an Osasun Zientzietako etengabeko prestakuntzako jarduerak diruz laguntzeko. Deialdiaren oinarriak gaurko, asteleheneko Nafarroako Aldizkari Ofizialean argitaratuta daude (apirilaren 18ko NAO, 73. zk.).

Laguntzak honako hauentzat dira: Osasun Departamentuari eta haren erakunde autonomoei atxikitako zentroetako profesionalentzat; departamentuko ikerketa-proiektuak egiteko kontratutako langile teknikoentzat, eta irabazi-asmorik gabeko osasun-zentro pribatuko langileentzat. Diru-laguntzen helburua ondorengo modalitateetan egindako jarduerek sortutako gastuak ordaintzea da:

- Ospe handiko erakunde edo entitateetako egonaldiak, estatukoak edo atzerrikoak, teknologia berrietan gaitasunak eskuratzeko; osasun-kudeaketako arloan; edo ikerketa-lerroei laguntzeko eta Foru Komunitateko zentro edo erakundeetako proiektuekin bat datozenak.

- Beste zentro batzuetako prestakuntzako egonaldiak, Departamentuak baimendutako osasun-prestakuntza espezializatuaren programetako txandatzeak betetzeko.

- Eskatzaileak aktiboki (ekarpenak eginez) parte hartuko duen kongresuetara eta bilera zientifikoetara joatea.

Laguntzak eskatzeko epea maiatzaren 18an amaituko da, eta honako hauek ordainduko dituzte: izena emateko gastuak (800 euro gehienez), joan-etorriak (200 euroraino Espainian, 400 Europan eta 750 beste helmuga batzuetarako), ostatu hartzea eta mantenua (helmuga eta iraupenaren arabera aldatuko diren zenbatekoekin). Eskatzaile bakoitzeko prestakuntza-jarduera bat lagunduko da diruz.

2015ean 210.000 euroko 197 laguntza banatu ziren, guztira. Haietatik, 83 Nafarroako Ospitaleguneko profesionalei dagokie, 24 Nafarroako Unibertsitate Klinikoari, 7 Osasun Mentaleko Arloari, 6 Lehen Mailako Arretari, 2 Garcia Orcoyen ospitaleari (Miguel Servet- Navarrabiomed fundazioarena eta CIMArena), eta 1 Nafarroako Osasun Publikoaren eta Lan Osasunaren Institutuarena.