Nafarroako Ospitaleguneak Larrialdi Zerbitzua hobetzeko plan bat ezarriko du laguntza-kalitatea handitzeko eta pazienteei arreta emateko erantzun-denborak murrizteko asmoz. Aldi berean, Iruñeko San Martin Doktorea anbulatorioko ospitalez kanpoko larrialdi-zerbitzuko espazioa handituko da.

Osasuneko kontseilari Fernando Dominguezek Foru Gobernuari aurkeztu dizkio neurriak gaurko bileran.

Nafarroako Ospitaleguneko hobekuntza-planaren arabera, funtsezko hiru puntutan jardungo da: antolaketako baliabideak, baliabide materialak eta inbertsioak, eta langile-baliabideak. Jardueren barnean, haietako batzuk hasi dira jadanik, plantillan 11 profesional gehiago izatea sartzen da, ekipamendu mediku gehiago erostea, triajeko bosgarren postu bat irekitzea (pazienteen harrera eta lehen balorazioa) eskaera handieneko uneetan, familientzako informazio-puntu bat jartzea, eta profesionalen kokapena berriz antolatzea haien mugikortasuna murrizteko, beste ekintza batzuen artean.

Plana diziplina anitzeko lantalde batek egindako diagnostikoaren emaitza da (medikuak, erizainak, laguntzaileak, zeladoreak, administrariak, ETEak), eta hura iragan urrian sortu zen ondorengo xedearekin: plan funtzionala ebaluatzea, zerbitzuaren funtzionamenduan izan daitezkeen akatsak aztertzea pazienteari laguntzeko prozesu guztian eta arretaren kalitatea hobetzeko neurri zuzentzaile egokiak proposatzea. Hala, berariazko helburuen araberako azpitaldeak sortu ziren (arreta-zirkuitu, behaketa, bizkortze, triaje eta harrerari buruzkoak). Partaidetzako prozesu honetan proposatutako neurri asko hobekuntza-planaren barnean sartu dira.

Nafarroako Ospitaleguneko Larrialdi Zerbitzuan diagnostikatutako arazo nagusiak pazienteei dagokienez, honako hauek dira: arreta emateko eta erabakitzeko denborak, familientzako informazio-punturik ez izatea eta espazio zehatz batzuk egokituta ez izatea. Horri, eskaera handieneko une jakin batzuetan langile-defizita izatea gehitu behar zaio.

Azkenik, akats tekniko batzuk hauteman dira. Haien artean, antolaketa-defizit bat aipatu behar da bizkortze, areto balioanitz, behaketa eta B zirkuituko (paziente larrientzako arreta) arloetan. Balio anitzeko aldea ez da behar bestekoa egiaztatu da eskaera handieneko uneetan erantzuteko, eta alor horretan Erizaintzako kontrol nahiz koordinazioko defizita dagoela. Azterketak, gainera, honako hau jasotzen du: profesionalen arteko barneko deietarako erreferentzia puntu nagusi bat ez dagoela, eta Erizaintzako kirurgia-espezialisten eta langileen presentzia koordinatzeko beharra dagoela kontsultetan.

Antolaketan, laguntzeko langileen funtzioak nahiz kokapena berriz antolatuko dira eta, horri esker, baliabideak optimizatu ahalko. Hala, areto balioanitza Erizaintzako langileei esleituko zaie, eta erizaintzako ekipo egonkor bat ezarriko da Behaketa gunean egungo txandakatze-sistemaren ordez. Gainera, bosgarren triaje bat irekitzea agindu da itxaroteko denborak areagotzen diren uneetarako, paziente gehiago daudenerako.

Garatuko diren antolaketako beste neurrietako batzuk honako hauek izango dira: jardunbide-plan bat prestatzea Zerbitzuak gainezka egiten duenerako; jarduera handieneko aldiak berriz definitzea (gripe-epidemia, Aste Santua, San Fermin...); pazienteak kudeatzea errazten duten prozedurak idatzi eta eguneratzea (paziente kritikoak artatzeko irizpideak, Behaketan sartzea...); Larrialdietarako berariazko prestakuntza-plan bat prestatzea; Behaketa arloaren kudeaketa hobetzea eta jarduerak jardunbide egokien eskuliburu batean jasotzea.

Azkenik, osasun-arretarako beharrezkoa den materia jasotzeko biltegiak berriz antolatuko dira, farmazia berriz egituratu eta automatizatuko da, eta pazienteak irrati-frekuentzia bidez automatikoki lokalizatzeko sistema abian jartzea aztertuko da.

Baliabide materialetan, informazio-puntu bat ezartzea aurreikusi da, eta barruti guztian seinale horizontalak jartzea, paziente eta senideen joan-etorria errazteko asmoz.

Espazioetan, kontsulta-kopurua mugatua dela ikusirik, bizkortze-boxaren erabilera zabaltzea aurreikusi da paziente larriak baina kritikoak ez direnak artatzeko, eta laguntzeko jarduera gehiago egitea balio anitzeko boxetan.

Paziente eta profesionalen gehiegizko mugikortasunak eragindako efizientzia eza zuzentzeko lanarekin jarraituko da.

Ekipamendu medikuetan, 208.000 euro inbertituko da honako hauek erosteko: 2 ECG aparatu (elektrokardiograma), bizi-konstanteen 4 monitore, RX eramangarriko ekipo bat, sendagaiak kudeatzeko sistema, 12 esku-ohe eta 10 gurpildun aulki, besteak beste.

Halaber, Larrialdi Zerbitzuko plantillan 11 profesional gehiago aurreikusten dira, hasiera batean: 2 mediku ondoko, 3 erizain, 2 erizain-laguntzaile, 2 zeladore eta 2 profesional pazienteei eta familiei informazio-puntu berrian arreta emateko. Indartze hori Nafarroako Ospitaleguneko langileen berrantolaketaren nahiz kontratazioaren bidez egingo da.

Paziente bat Larrialdi Zerbitzura iristen denean, triajean baloratu eta arreta-larritasunaren arabera sailkatzen da. Bost lehentasun finkatzen dira, Larrialdietako Medikuntzaren Espainiako Sozietatearen arabera: lehentasun gorena, berehala artatzea eskatzen duten paziente kritikoak; 2. lehentasuna, paziente larriak edo 15 minutu baino lehen artatu behar diren pertsonak; 3. lehentasuna, larrialdi gutxiagoko pazienteak eta 60 minutu baino lehen artatu behar direnak; 4. lehentasuna, 120 minutu baino lehen artatu behar diren paziente arinak; eta 5. lehentasuna, premiarik gabeko egoeran dauden pazienteak eta 240 minutu baino lehen artatu behar direnak.