Kontratu mugagabeen igoera

Laparra lehendakariordeak ere nabarmendu du "kontratazio mugagabeak igo egin direla, hau da, kalitatezko enplegu gehiago dagoela. Baina, hala ere, aurrera egiten jarraitu behar da, alde batetik, langabezia-zifrak murrizteko indar handiagoa eginez, eta bestetik, enpleguaren ikuspegi batetik, kalitate handiagoko lanpostuen sortu ahal izateko" gaineratu du.

Nafar Lansarean 27.599 kontratu erregistratu dira 2016ko apirilean (Foru Komunitatean lantokia dutenak). Aurreko hilean baino 27 kontratu gutxiago dira, eta hileko jaitsieraren % 0,10 da. Urteko terminoetan, kontratu-kopurua % 5,97 igo da 2015eko apirilean izandako kontratuen aldean, hau da, 1.556 kontratu gehiago.

Kontratazio-tipologiari begiratuz, kontratu mugagabeek % 10,04 egin dute gora 2016ko martxoarekin alderatuz (160 gehiago). Halaber, 2015eko apirilarekin alderatuz, kontratu mugagabeak % 23,52 igo direla azpimarratu behar da (334 kontratu gehiago). Horrek esan nahi du, zenbait hilabetetan estreinakoz, kontratu mugagabeen pisua % 6 baino handiagoa dela.

Zehazki, iragan apirilean egindako kontratu guztietatik, mugagabeak % 6,36 dira. Zifra horiek duela urtebetekoak baino positiboagoak dira: kontratu mugagabeak % 23,52 igo dira, 2015eko apirilean baino 334 kontratu mugagabe gehiago, eta kontratazio mugagabearen pisua portzentaje aldetik puntu bat handiagoa da, iazko hil berean % 5,45 izan baitzen.

Enplegu-agentzien arabera, langabeziak behera egin zuen iragan hilean Lodosan (-% 9,68), Tafallan (-% 4,22), Tuteran (-% 3,87), Lizarran (-% 3,71), Yamaguchin (-% 2,81), Altsasun (-% 2,58), Zabalgunen (-% 1,98) eta Arrotxapean (-% 1,98), eta igo Donezteben (% 0,83) eta Agoitzen (% 3,74%).

Sexuaren arabera, 23.872 emakume daude lanik gabe (guztiaren % 55,67), hau da, % 1,57 jaitsi da (382 emakume gutxiago), eta 19.007 gizon (guztiaren % 44,33), % 4,32ko jaitsierarekin (858 gizon gutxiago) aurreko hilarekin alderatuz. Hileko aldaketa erlatiboak adierazten du, 2016ko martxotik apirilera, langabezia portzentaje aldetik 2,75 puntu gehiago jaitsi dela gizonezkoetan emakumezkoetan baino. Halaber, urteko aldaketa aztertzen bada, langabeziaren banaketa desorekatua izan dela ikus daiteke. Urte batean gizonezko langabeen kopurua % 10,21 jaitsi da, eta emakumezkoetan, % 5,27. Sexuaren araberako azterketa honetan, emakumeentzako datu positibo bat dago: jaitsiera hori aurreko urteko hil berarekin alderatuz handiena izan dela krisia hasi zenetik.

Adin-taldeei dagokienez, 25 urtetik beherako 4.290 langabe daude, kopuru guztiaren % 10, hau da, aurreko hilean baino % 0,61 gehiago (26 pertsona gehiago). 25 eta 44 urtekoen artean, 19.414 langabe, kopuru guztiaren % 45,28, martxoan baino % 3,65 gutxiago (736 gutxiago). Bestalde, 45 urte edo gehiago dituzten 19.175 langabe daude, hots, kopuru guztiaren % 44,72, aurreko hilean baino % 2,69 gutxiago (530 gutxiago).

Sektore ekonomikoei dagokienez, langabeziak sektore guztietan egin du behera, `aurrez enplegurik gabeko´ arloan izan ezik; azken horretan 54 pertsona gehiago dago lanik gabe. Jaitsera handiena Zerbitzuetan gertatu da (712 pertsona gutxiago), eta atzetik datoz Industria, Eraikuntza eta Nekazaritza sektoreak (227, 181 eta 174 pertsona gutxiago, hurrenez hurren).