Nafarroako Gobernuak gaurko bileran hartutako erabakiaren bidez, Landa Garapeneko, Nekazaritzako eta Abeltzaintzako zuzendari kudeatzaileari baimena eman zaio 500.000 euroko gastua egin dezan abeltzaintzako tokiko azpiegituretarako laguntzak finantzatzeko; laguntza horiek edanlekuetara ur garbia eramateko putzu berrietan oinarritzen dira.

Era honetako jarduerak egiten hasi zenetik, gaixotasun infekziosoak gutxiago kutsatzen lagundu dute modu eraginkor batean, tuberkulosia bereziki.

Gaur hartutako neurria 2014-2010 epeko Nafarroako Landa Garapeneko Programaren barnean dago, Europako Batzordeak 2015eko azaroan onartua. Nafarroako Gobernuaren laguntzak babestu daitekeen inbertsioaren % 50eraino heldu daiteke. Laguntza hori eman ondoren, Landa Garapenerako Europako Nekazaritza Funtsak kofinantzatu ahalko du, % 31arekin. Aldiz, toki-erakundeek gainerakoa jarri ahalko dute.

Abeltzaintzari eta animalien elikadurari lotutako ur-hornikuntzako jarduerez gain, edanlekuak eta putzuak adibidez, laguntza horiek honako hauetarako dira, halaber: bide publikoak, abelbideak eta bazken edo abeltzaintzako beste ustiapengune batzuen beste bide batzuk sortu eta hobetzea; abeltzaintzako lehiaketak eta azokak egiteko azpiegiturak; udal-eskortak sortzea; eta eraikuntzak eraiki edo birgaitzea abeltzaintzari lotutako zerbitzuen ekipamendu publikoetarako.

Gainera, abeltzaintzako ustiapeneko azpiegituretarako balioko dute, esaterako: elektrifikazioak, telefonia, ur-hornikuntza edo hondakin-uren ebakuazioa; balioko dute, halaber, herri-basoetako larreei lotutako azpiegitura nahiz hornikuntzetarako, adibidez: putzuak, itxiturak, ubideak, azienda maneiatzeko esparruak edo langa kanadarrak.

2007-2013 epeko Landa Garapeneko Planaren babesean, 17 milioi euro inbertitu ziren abeltzaintzako tokiko azpiegiturak sortzen eta hobetzen; haiei esker hainbat jarduera egin ahal ziren: 65 edanleku, 16 langa kanadar, 12 putzu, azienda maneiatzeko 8 esparru eta 6 eskorta. Halaber, bideen 132 kilometro konpondu ziren, 140 kilometroko itxiturak eta 18 kilometroko ubideak egin ziren.