Nafarroako Gobernuak ikasturte honetarako 2015eko urriaren 1a baino lehen kontratatutako irakasleek (administrazio-araubidean) udako oporrak kobratuko lituzkete, funtzionarioekin gertatzen den moduan; hala jasotzen da Lehendakaritzako, Funtzio Publikoko, Barneko eta Justiziako kontseilari Mª Jose Beaumontek gaur astelehena, maiatzak 16, Funtzio Publikoko Mahai Orokorreko sindikatuei aurkeztutako foru-dekretuaren zirriborroan, negoziatua izan dadin.

Neurri horrek ordezkapenetako kontratuei nahiz langileen behar berriei erantzuteko formalizatutako kontratuei eragingo die. Gainera, irtenbide bera aplikatuko da Hezkuntza Departamentuaren mendeko zentroetan laguntza-motako zerbitzua betetzen duten langileen kasuan.

Aurreko ikasturteetan, kontratazio horiek ekainaren 30ean amaitzen ziren eta, beraz, langile horiek ez zuten udako hilabeteak kobratzen, nahiz eta ikasturte guztian lanean jardun. Aldiz, Nafarroako Gobernuak aipatutako foru-dekretua onartzen duenean, abuztuaren 31ra arte luzatuko dira, baldin eta urriaren 1a baino lehen izenpetu badira eta ikasturtea amaitzean indarrean segitzen badute. Aldaketa hori premiaz izapidetuko da uda honetan bertan indarrean sar dadin.